UVIÉU, 15 d'Ochobre (EUROPA PRESS)
La directora xeneral de Promoción Cultural y Política Llingüística, Consuelo Vega, afirmó esta selmana que la "oficialidá de la llingua asturiana va llegar cuando haya un mayor alcuerdu políticu". Dende'l so puntu de vista, esti alcuerdu va espeyar el sentir mayoritariu de la sociedá.
Nuna entrevista concedida a Europa Press, Vega refirióse al tratamientu de la LLingua nel Estatutu d'Autonomía. Recordó, nesti sen qu'IX-BA-LV sigue exixendo la inclusión de la reconocencia de la oficalidá de la llinuga, pero precisó qu'esta midida "exixe una mayoría cualificada". "El PSOE nun lo incluyó nel programa electoral, el PP paez que tampoco apuesta pola oficialidá, siendo IX, un partíu minoritariu, l'únicu que l'apoya", dixo la responsable rexonal.
Ye poro, dende'l so puntu de vista, "mui poco pesu pa facer un cambiu d'esti tipu" y añadió que "tien d'haber un mayor consensu pa que se llegue a una declaración d'oficialidá".
Sicasí, la directora xeneral entiende que "hai un campu mui grande pa trabayar col marcu llegal qu'existe agora", en referencia al actual Estatutu d'Autonomía, y la Llei de Promoción y Usu del Asturianu nél reconocida.
Na so opinión, "la oficialidá conlleva ya otru tipu d'actuaciones y de compromisos per parte de toles instituciones públiques de la ciudadanía".
REVISIÓN DE LA LLEI.
Al respecto de la Llei de Promoción y Usu del Asturianu, Vega espresó la intención del Principáu de revisar y modificar la norma si'l Tribunal Constitucional decide finalmente que'l so artículu 4.2 ye inconstitucional como apuntó un xulgáu d'Uvieú.
Aludió nesti sen al procesu abiertu tres el recursu del lletráu del Principáu Xurde Blanco, dempués de que la'Alministración refugara tramitar una solicitú de permisu d'ésti, por tar escrita n'asturianu.
L'abogáu presentó una alegación nel Xulgáu Contenciosu-Alministrativu d'Uviéu, apoyándose nel artículu 4.2 de la llei, que diz que "el Principáu va tomar por bones toles comuniciones orales o escrites prsentaes polos ciudadanos n'asturianu". El Xulgáu solicitó al respecto'l pronunciamientu del TC sobre la posible "inconstitucionalidá" del artículu 4.2.
Agora Vega anunció que'l Principáu "va acatar lo que diga'l TC". "Si se decide que l'artículu ye inconstitucional, la llei va quedar un poco comprometida y poro va haber que revisala y modificala naquellos artículos nos que seya inconstitucional", matizó. Agora bien "si'l Tribunal Constitucional decide que l'artículu ye constitucional y que, como pide Xurde Blanco, hai qu'atender non sólo a los ciudadanos, sinón también a los funcionarios, vamos aplicalo".
La intención de Xurde Blanco ye que los tribunales reconozan non sólo'l derechu de los ciudadanos a dirixise n'asturianu a l'Alministración, sinón también el de los propios funcionarios.
N'esti sen, Consuelo Vega esplicó la interpretación que'l Principáu fizo del artículu a la hora de tramitar la solicitú de Blanco: "la Llei de Promoción y Usu ampara a los ciudadanos que se dirixen, y a ésos sigue amparándolos, pero nun se refier al furrulamientu ente los propios funcionarios, porque na práctica diba ser mui difícil algamar que tolos emplegaos públicos se formaren en conocencia d'asturianu". Por esti motivu, la directora xeneral piensa que "la llei nun ye inconstitucional".
Al marxe de la cuestión de Blanco, Vega dexó claro que "menos dalguna anécdota puntual, nunca hubo nengún problema nes comunicaciones n'asturianu de los ciudadanos hacia l'Alministración". Nes comunicaciones escrites", prosiguió, "dende que s'aprobó la Llei, cuando se presenta un escritu cenciellu, el mesmu sigue la so tramitación ensin más".
Nel casu de que seya dalgo más complexu, la resposable de Política Llingüística esplicó que "el departamentu correspondiente unvía'l documentu a la Conseyería de Cultura pa que se faiga una traducción oficial y actúase sobre'l castellán".
Asina, "el ciudadanu nun sufre nengún perxuiciu, porque internamente na Alministración facilítase la traducción al departamentu que lo necesite, y esto nun supón nengún problema", finó.