UVIÉU, 15 de Xineru (EUROPA PRESS)
El Sindicatu Unitariu Autónomu de Trabayadores de la Enseñanza d'Asturies acusó güei a la Conseyería d'Eduación del Gobiernu asturianu d'incumplir la Llei de Promoción y Usu del Asturianu asina como l'Alcuerdu del Personal d'Eduación Infantil y Primaria, al non incluyir nos niveles d'educación infantil l'asignatura de llingua asturiana como tal.
El sindicatu realizó estes manifestaciones al traviés d'un comunicáu, tres la presentación ayeri, per parte del Gobiernu del Principáu, del borrador del currículu educativu pa infantil y primaria.
Según esplicó la organización, "nel mesmu queda a les clares recoyío que nel segundu ciclu d'Educación Infantil los neños y neñes s'averen a la Llingua Estranxera, y asina mesmo s'inclúi la enseñanza de la relixón". "Pero faltaría más, la llingua asturiana nun queda espeyada como tal, sinón que se plantega como una globalidá dientro de la cultura asturiana", añade'l comunicáu.
La organización señaló amás que "con esti currículu preténdese adoctrinar a tolos escolinos d'Educación Infantil en relixón, y por supuestu, el mayestru de relixón sí pue entrar nes clases a deprender a los neños; mentatu'l de llingua asturiana nun va poder dar les sos clases, quedando la enseñanza del asturianu nun requexu de la cultura de pandereta y folixes".
Pa Suatea "esti fechu ye un incumplimientu grave tanto de la Llei d'Usu como del Alcuerdu de personal d'Educación Infantil y Primaria nel que queda recoyío que se dotará d'especialista de Llingua Asturiana a tolos centros".
Pal sindicatu "ta perdemostráu que la conocencia de la llingua materna facilita la conocencia d'otres llingües, pero n'Asturies como somos tan llistos, d'una tirada quitamos la llingua materna de los nuestros escolinos".
Por estos motivos, el sindicatu exixe la "eliminación de les ratios mínimes pa la constitución de grupu". Pide tamién la "incorporación de la enseñanza de la Llingua Asturiana nel currículu d'infantil". Y por último, demanda "midíes d'estabilización nel personal de los docentes de llingua".