MADRID, 23 de Marzu (EUROPA PRESS)
Unes 15.000 persones evacuáronse nel este d'Ucrania tres les esplosiones rexistraes esti xueves pela mañana nun depósitu d'armes na población de Balakleia, na provincia de Járkov, según informó l'axencia de noticies rusa Sputnik.
Les autoridaes ucranianes establecieron un importante perímetru de seguridá de siete kilómetros, según esplicó'l fiscal militar Anatoli Matios.
"Llevóse a cabu la evacuación de sobre 15.000 habitantes de la zona de seguridá", informó nun comunicáu'l Serviciu Estatal d'Emerxencies, antes de confirmar que se rexistraron delles esplosiones de diversa intensidá nel almacén.
Esti xueves pela mañana rexistráronse delles esplosiones de proyectiles d'artillería y de carros de combate de resultes de la quema nel almacén militar. "La circulación de los trenes de pasaxeros interrumpióse", añadió'l Serviciu Estatal d'Emerxencies.
El depósitu del Exércitu ucranianu alcuéntrase ubicáu na ciudá de Balaklea, a unos 64 kilómetros de Lugansk, onde les tropes baxo mandu del Gobiernu ucranianu caltienen dende'l 2014 una operación militar contra les milicies separatistes prorruses. El Gobiernu ucranianu esplicó que tovía desconoz les causes del fueu pero nun descarta que lu causara un sabotaxe.
