Los 27 acuerden revisar el sistema de cuotes llecheres nel 2010

Reuters

BRUSELES, 20 de Payares (EUROPA PRESS)

Los 27 de la UE pesllaron güei un acuerdu políticu por mayoría cualificada pa caltener nun ún por cientu añal l'incrementu de cuotes llecheres demientres los próximos cinco años, un sistema que va revisase nel 2010 y el 2012, y amenorgar al 10 por cientu el recorte de les ayudes directos a los agricultores nel 2012. Esti acuerdu permitió algamar un consensu sobre la reforma de la Política Agraria Común (PAC) y salvar los dos principales torgues de la negociación, que se prollongaron demientres más de 15 hores.

Asina, el testu qu'aprobaron los 27 fixa nun 2 por cientu'l recorte de les ayudes directes a los agricultores que reciban más de 5.000 euros en subsidios nel 2009. La tasa va incrementase otru 1 por cientu añal demientres los tres años siguientes, hasta 2013. D'esta manera, nel 2012 van sumase un cinco por cientu a la modulación del 5 por cientu que yá s'aplica a estos productores.

Nel casu de la modulación progresiva, ye dicir, adicional a la primera, suprímense los recortes propuestos pola Comisión a les ayudes d'ente 100.000 y 299.999 euros y sólo se caltién el que s'aplica a los productores qu'algamen más de 300.000 euros, pero amenorgando al 4% el 6% que recomendó Bruseles esti miércoles.

Amás, Bruseles caltién la so propuesta d'aumentar añalmente un 1% les cuotes de producción llechera demientres cinco años pa facilitar a los productores un 'aterrizaxe suave' cuando nel 2015 s'eliminen por completu diches cuotes. Sicasí, el testu aprobáu introduz la novedá de que la Comisón ellabore dos informes, nel 2010 y el 2012, pa evaluar l'impautu del sistema de cuotes nel mercáu llecheru.

Per otra parte, l'acuerdu descarta prollongar hasta'l 2012 les ayudes actuales al cultivu de tabacu, tal y como reclamaben dellos países, incluyíu España, y miles de tabaqueros que se manifestaron esti martes en Bruseles. El documentu recuerda que yá hubo una decisión de los 27 sobre esta cuestión nel 2004.

Los tabaqueros sí podíen beneficiase d'una midida adicional incluyía nel apartáu de desarrollu rural que diba permitir a los productores acoyese a una ayuda ente'l 2011 y 2013 (d'un máximu de 4.500 euros el primer añu, 3.000 el segundu añu y 1.500 el terceru), pero baxo criterios "mui estrictos" que diben pasar per un plan de reestructuración.