XINEBRA, 19 d'Agostu (Reuters/EP)
L'Altu Comisionáu de la ONU pa los Refuxaos (Acnur) anunció esti martes el llanzamientu d'una gran operación d'asistencia pa facer llegar suministros a más de mediu millón de persones desplazaes pol conflictu nel norte d'Iraq.
L'envíu per aire mientres cuatro díes de tiendes de campaña y otros bienes de primer necesidá va empezar el miércoles con destín a Erbil, nel Kurdistán iraquín, dende Aqaba, en Xordania, a lo que van siguir convóis per carretera dende Turquía y Xordania y envíos per mar dende Dubái, al traviés d'Irán nos próximos diez díes, esplicó'l voceru d'Acnur, Adrian Edwards.
"Ésta ye una ofensiva d'ayuda bien significativa y verdaderamente una de les mayores que pueo recordar en bien de tiempu", sorrayó Edwards mientres un briefing en Xinebra. "Ésta ye una gran crisis y un desastre humanitariu. Sigue afectando a munches persones", añadió.
Acnur estima qu'un total de 1,2 millones de persones abandonaron los sos llares n'Iraq esti añu. Dende agostu, unes 200.000 d'elles estableciéronse na rexón del Kurdistán iraquín, cuando la ciudá de Sinjar y árees vecines cayeron embaxo'l control del Estáu Islámicu, según l'axencia de la ONU.
Polo menos 11.000 persones de la minoría yazidina abellúguense na vecina Siria, afectada pola guerra civil, y otres 300 tán cruzando la frontera de Peshkabour con esti país cada día, según el voceru.
"El fechu de que se vea a persones fuxendo hacia Siria pa buscar seguridá fala de lo desesperante de la situación, particularmente en Sinjar nos últimos díes", resaltó Edwards.
L'envíu d'ayuda inicial va incluyir 3.300 tiendes de campaña y 20.000 cobertories de plásticu p'abellugase, 18.500 sets de cocina y 16.500 garrafes, precisó. La entrega cuenta col apoyu d'Arabia Saudina, Reinu Uníu, Estaos Uníos y otros donantes.
