MADRID, 20 Mar. (EUROPA PRESS) -
La 'númberu dos' del PSOE, Adriana Lastra, acusó esti martes a Ciudadanos d'asumir "l'heriedu" del expresidente del Gobiernu José María Aznar o del partíu d'ultraderecha Vox "xugando a la confrontación ente territorios y ciudadanos" y aprovechando que nun gobierna nenguna Comunidá Autonóma y malapenes tien mediu centenar de conceyos.
En declaraciones a los medios de comunicación enantes d'entrar nel Plenu del Congresu de los Diputaos, Lastra reconoció nun sosprendese de la decisión de Ciudadanos d'abandonar la Comisión parllamentaria d'estudiu sobre'l funcionamientu y posible modernización del Estáu autonómicu.
Lastra recordó que Ciudadanos votó en contra de la creación d'esta comisión, a pesar de que depués, una vez yá constituyida, decidió nun quedase fuera. Eso sí, dende los empiezos de los trabayos, los diputaos 'naranxes' "nun fixeron más que xenerar problemes", según la vicesecretaria xeneral del PSOE.
La diputada asturiana confirmó que, a pesar de la marcha de Ciudadanos, el PSOE, impulsor de la comisión, va siguir participando nos sos trabayos, porque considera que ye "la so obligación poner soluciones sobre la mesa" nuna situación de gran conflictu ente territorios" como la que, al so xuiciu, ta produciéndose n'España.
Pa los socialistes, la crisis en Cataluña ye'l principal esponente del escosamientu del Estáu autonómicu actual, que s'estiende pol restu del territoriu nacional. Esta comisión d'estudiu, que parte d'una propuesta del PSOE, tenía que sirvir de marcu p'atopar una salida a la crisis catalana, favoreciendo'l diálogu ente les distintes fuercies polítiques. Los socialistes confiaben tamién en que fuera l'antoxana de futuros trabayos sobre la reforma constitucional.
La comisión echó a andar col artículu 155 de la Constitución aplicáu yá en Cataluña, lo que provocó que namás PP, PSOE y Ciudadanos participaren nos sos trabayos.
Lastra aprovechó l'anunciu de Ciudadanos pa pidir al restu de formaciones que se xunten a la Comisión cola fin d'evaluar el funcionamientu del Estáu de les autonomíes y "poner soluciones sobre la mesa".
Ciudadanos xustificó la so marcha na negativa del PSOE a que comparecieren nesa comisión referentes históricos socialistes críticos cola descentralización del Estáu y más batallosos col nacionalismu como Alfonso Guerra, Juan Carlos Rodríguez Ybarra o José Bono.
Lastra señaló que'l PSOE quier llamar a la xente que "más pue ufrir" pa cada momentu de los trabayos de la Comisión y recordó que los trés grupos alcordaron cerrar les sesiones d'esti órganu parllamentariu colos expresidentes del Gobiernu y l'actual xefe del Executivu, Mariano Rajoy.
