Los afectaos de Forum Filatélicu n'Asturies piensen que "se perdió una batalla, pero non la guerra"

Recurrirán ante'l Tribunal Européu d'Estrasburgo nos próximos trés o cuatro meses

UVIÉU, 05 de Febreru (EUROPA PRESS)

El secretariu xeneral de l'Asociación de Consumidores Afectaos de Fórum Filátilicu d'Asturies (Acaffa), Enrique López Fernández, consideró que la sentencia dictada pola Audiencia Nacional que refuga la responsabilidá patrimonial de l'Alministración por nun controlar a Fórum Filatélicu y Afinsa supón que "se perdió una batalla, pero non la guerra".

En declaraciones a Europa Press, López dixo que tres lleela, hai malpenes unes hores, sentóse nel sofá "a escuchar ópera y a pensar en tolo que se fizo demientres los últimos cuatro años". "Siéntome casi como nun funeral, como nun velatoriu", comentó.

Esplicó qu'en xunu del añu pasáu los afectaos decidieron qu'elevaríen la denuncia al Tribunal Européu d'Estrasburgo, pero teníen esperanza de qu'hubiere responsabilidá per parte de l'Alministración. "De momentu tenemos que siguir vixilando la lliquidación de los bienes de Forum y nun mes y mediu vamos aconceyamos n'asamblea n'Uviéu pa establecer un plan de trabayu", señaló.

Al so xuiciu, la sentencia de l'Audiencia Nacional ye "categórica y contundente" y sólo da la posibilidá de recurrir a aquéllos pa los que les perdes superen los 150.000 euros, cuando la mayoría tán ente 12.000 y 50.000 euros. Del 20 por cientu del total que podrán recurrir al Supremu, sólo "unos diez" son afectaos asturianos.

DRAMA HUMANU

Amás, asegura que nestos momentos recuerda a la xente humilde que tenía esperanza en recuperar un dineru que "necesitaba pa tirar p'alantre".

El supuestu fraude de Forum Filatélicu dexó n'Asturies 1.392 afectaos, con contratos que sumen un total de 20.093.009 euros, la quincuaxésima parte del total del dineru estafáu, según los datos facilitaos pola Alministración Concursal.

Invervínose a Fórum Filatélicu xunto a Afinsa en mayu del 2006, casusaes pola Fiscalía Anticorrupción d'estafa. Más de 450.000 aforradores españoles qu'invirtieron los sos aforros en sellos baxo la promesa d'una alta rentabilidá, fueron víctimes del fraude. Les dos sociedaes alcontrábense en bancarrota técnica dempués de recurrir ente 1998 y el 2001 a un fraude piramidal pa pagar los altos intereses que prometíen.