XINEBRA (SUIZA), 19 de Xunetu (Reuters/EP)
Los restos d'una pareya suiza desapaecido va 75 años nos Alpes apaecieron nun glaciar en dexelu, según informó esti martes la prensa del país européu.
La Policía de Valais afirmó que los dos cuerpos, que portaben los sos documentos d'identidá, apaecieron la selmana pasada nel glaciar Tsanfleuron, cerca d'un telesilla d'un centru d'esquí del resort de -Les Diablerets, a una altitú de 2.615 metros.
Los restos, alcontraos por un trabayador del centru d'esquí, taben parcialmente soterraos nun furacu nel xelu. Darréu, una autopsia y exames d'ADN confirmaron la identidá de la pareya.
Marcelin y Francine Dumoulin desapaecieron en llevando al so ganáu a un prau cercanu del pueblu de Chandolin, ubicáu nel cantón de Valais, el 15 d'agostu de 1942. La pareya tenía siete fíos.
"Pasamos tola nuesa vida buscándolos, sin parar. Pensábamos que dalgún día podríamos faceyos el funeral que se merecíen", dixo la fía menor, Marceline Udry-Dumoulin, al diariu 'Le Matin de Lausana'.
"Pueo dicir que dempués de 75 años esperando esta noticia tengo una fonda sensación de calma", añadió la muyer, de 79 años.
El director del centru d'esquí, Bernhard Tschannen, afirmó que "los cuerpos taben cerca l'unu del otru", añadiendo que "llevaben ropes del periodu de la Segunda Guerra Mundial".
"Taben perfectamente calteníos nel glaciar y les sos pertenencies intactes", manifestó. La pareya figuraba nuna llista de 280 persones declaraes desapaecíes nos Alpes o ríos de Valais dende 1925, tal como desvelaron les autoridaes.
