UVIÉU, 22 de Febreru (EUROPA PRESS)
L'IES númberu 5 d'Avilés celebró'l Día Internacional de la Llingua Materna estrenando en YouTube un curtiumetraxe ellaboráu pol alumnáu de primeru d'ESO matriculáu na asignatura d'Asturianu.
El cortu, tituláu "Veníi a xugar conmigo", ye obra de los almunos Izan Álvarez, Íker Corujedo, Marcos González y Nel Llope, cola ayuda del so profesor de Llingua Asturiana y Lliteratura, Inaciu Galán. El curtiumetraxe pue vese yá na rede (https://www.youtube.com/watch?v=D0XWL6QudRE) y va proyectase nes clases a lo llargo d'esta selmana, amás de circular nes redes sociales, al traviés de la cuenta de l'asignatura d'asturianu nel centru en Twitter @ies5asturianu
Según esplicó l'asociación Iniciativa Pol Asturianu, presidida pol mesmu profesor, dientro de l'asignatura d'asturianu va grabase estos díes amás, per parte de tol alumnáu, un videu nel qu'alumnos y alumnes del centru van dar llectura al "Manifiestu pola Llingua Materna", una iniciativa de la Conseyería d'Educación fecha col envís de da-y sofitu a les llingües propies d'Asturies nesta celebración internacional del 21 de febreru.
