MADRID, 22 de Mayu (EUROPA PRESS)
El voceru socialista nel Senáu, Vicente Álvarez Areces, va siguir nel cargu, polo menos, hasta la celebración del 39 Congresu socialista de los díes 16, 17 y 18 del próximu mes de xunu, según informaron a Europa Press fontes del Grupu Socialista na Cámara Alta.
Dende'l Senáu apúntase a que'l mandatu y "el compromisu" cola Xestora acaba en daqué menos d'un mes, polo que va ser entós cuando Álvarez Areces póngase a disposición de la dirección socialista que seya escoyida nel cónclave, que va tar encabezada por Pedro Sánchez, vencedor de les primaries d'esti domingu.
Álvarez Areces va siguir polo tanto nel so cargu, al contrario que'l voceru del PSOE nel Congresu, Antonio Hernando, que comunicó la so dimisión la mesma nueche del domingu en conociéndose la victoria de Sánchez.
En payares pasáu, tres la constitución de la Xestora, el so presidente l'asturianu Javier Fernández decidió la salida del daquella voceru na Cámara Alta, Óscar López, dempués de qu'ésti punxera'l so cargu a disposición del partíu tres la dimisión de Pedro Sánchez como secretariu xeneral del partíu nel Comité Federal del 1 d'ochobre. Darréu, Óscar López pasaría a ser collaborador d'otru de los candidatos a estes primaries, Patxi López.
