La militancia d'IU d'Asturies refuga entrar nel Gobiernu del PSOE n'Asturies

UVIÉU, 25 de Mayu (EUROPA PRESS)

Les bases d'IU refugaron esti xueves nes asamblees llocales entrar nel Gobiernu del d'Asturies presidíu pol socialista Javier Fernández. Izquierda Unida llegara a un principiu d'acuerdu col PSOE pa ocupar les Conseyeríes d'Agroganadería y de Bienestar Social y Vivienda, según la dirección xeneral de Patrimoniu, dependiente de la Conseyería de Facienda, que la militancia refugó.

Lo cierto, ye que según los datos oficiales del referendu entamáu al envís, los resultaos fueron apretadísimos. Ello ye que del total de votos emitíos polos militantes, 1.330, namás 16 marcaron la diferencia ente los que refugaron y los qu'aceptaron l'acuerdu de Gobiernu colos socialistes.

D'esta forma, 648 militantes d'IU d'Asturies, un 48,72 por cientu, votaron a favor del acuerdu, mientres que 664 votaron en contra, un 49,92 por cientu. Fueron 18 los que s'astuvieron, lo que significa un porcentaxe del 1,35 por cientu.

Especialmente destacaos fueron los resultaos de la votación celebrada en Xixón, onde una amplia mayoría refugaron l'acuerdu. De los 212 militantes qu'acudieron a votar, 132 pronunciáronse en contra del acuerdu de Gobiernu col PSOE.

Antes de la votación, l'actual coordinador d'IU d'Asturies, Jesús Iglesias, favorable a la entrada nel Gobiernu pidió públicamente a los militantes apoyu al acuerdu pa dotar d'estabilidá les polítiques del executivu asturianu. Esti vienres Iglesias va ofrecer una rueda de prensa pa referise a los resultaos.

El diputáu d'IU nel Congresu, Gaspar Llamazares, tamién partidariu del acuerdu, avanzó na so cuenta de Twitter, cuando yá se diben conociendo los resultaos na nueche del xueves, que la militancia n'Asturies decidiera nun entrar a formar parte del executivu asturianu. "Paez que la militancia d'IU d'Asturies opta por acuerdos parlamentarios, y non pol pactu de gobiernu. Democracia", escribió.