UVIÉU, 03 de Mayu (EUROPA PRESS)
La presidenta de l'Academia de la Llingua Asturiana, Ana Cano, calcó en que la oficialidá de la llingua asturiana nun supondría nengún problema económicu, y poro refugó l'argumentu de la crisis pa nun facilitar esta reconocencia dende les instancies polítiques.
Asina lo espresó mientres el so discursu nel actu institucional del Día de Les Lletres, que como tolos años l'Academia celebra nel Teatru Campoamor d'Uviéu.
Cano insistió na situación de crisis financiera, pa dexar claro qu'ello nun ha conllevar una dificultá pa la reconocencia de la oficialidá del asturianu. "Nun supondría nengún problema económicu", señaló, dexando claro que la midida desarrollaríase atendiendo a les llendes presupuestaries, polo que refugó "la crisis económica como razón pa la negativa a la so reconocencia".
Tolo contrario, na so opinión "sería un elementu de dinamización económica, dende'l puntu de vista de la industria cultural", señala la presidenta de l'Academia. Refugó'l "mieu" a la oficialidá, que na so opinión "yá nun tien sen", y aportunó en que "el pueblu asturianu y nós (l'Academia) nun vamos dexar esta reivindicación".
El discursu d'Ana Cano tuvo precedíu del nomamientu como Académicu d'Honor de David Melendi, presidente del Colexu d'Inxenieros Informáticos, y persona de significada identificación col trabayu de l'Academia. El programa incluyó tamién l'actuación del cantautor Toli Morilla, y la llectura de versos n'asturianu, al cargu de Próspero Morán y Sonia Avellaneda.
TOOS MENOS UPyD
L'actu contó con numberosos representantes de la vida política y social asturiana, ente ellos tolos partíos presentes na Xunta Xeneral d'Asturies, quitando Unión Progreso y Democracia (UPyD).
Per parte del PSOE tuvo la diputada autonómica Pilar Alonso y el diputáu estatal Antonio Trevín; pol PP, tuvo'l diputáu del PP, Alfonso Román, xunto colos conceyales del so partíu en Xixón, Paco Cubiella, y Uviéu, Jorge Menéndez Vallina; tuvo de Foru'l senador Isidro Martínez Oblanca; y algunos d'Izquierda Unida fueron les diputaes autonómiques Noemí Martín y Emilia Vázquez, el senador Jesús Iglesias, el coordinador xeneral Manuel Orviz, y l'alcalde de Mieres, Aníbal Vázquez, ente otros.
Asistieron tamién, ente otros, la directora xeneral de Política Llingüística, Ana Fueyo, el presidente del Real Institutu d'Estudios Asturianos (Ridea), Ramón Rodríguez, vicerrectores de la Universidá d'Uviéu como Vicente Domínguez, y la decana de la Facultá de Filosofía y Lletres, Cristina Valdés. Hubo coles mesmes representación de los sindicatos mayoritarios: UXT, CCOO y USO.
