UVIÉU, 24 de Payares (EUROPA PRESS)
La ventena edición del Premiu Xuan María Acebal de Poesía n'asturianu recayó n'Ángeles Carbajal. El premiu, que concede la Conseyería de Cultura, ta dotáu con 3.000 euros.
El xuráu encargáu de valorar les once obres presentaes tuvo presidíu pola directora xeneral de Política Llingüística, Ana M.ª Fueyo Llaneza, y integráu polos escritores Pablo Texón y Sofía F. Castañón y el filólogu Luis Casteleiro Oliveros.
A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempres que fueren inéditos y non premiaos n'otros concursos.
Ente les obres presentaes, el xuráu decidió por unanimidá conceder el premiu al poemariu tituláu L'aire ente la rama al destacar, según consta nel acta, "la voz personal y madura con que se va construyendo un poemariu harmónicu y de gran intensidá rítmica".
La obra presentóse baxo'l seudónimu Entel. Abierta la plica, l'autora ganadora resultó ser Ángeles Carbajal.
Ángeles Carbajal (Argüelles, Siero, 1959) ye llicenciada n'Hestoria del Arte pola Universidá d'Uviéu. Collaboradora de la revista Clarín y directora de talleres lliterarios entamaos pol Conceyu d'Uviéu o Caxastur, ye autora de los poemarios en castellán La caligrafía de la distancia (1993) y La sombra de otros días (2002), y del poemariu n'asturianu En campu abiertu, col que llogró nel 2012 el Premiu 'Teodoro Cuesta' de Poesía que convoca'l conceyu de Mieres.
