UVIÉU, 9 de Payares (EUROPA PRESS)
L'escritor, editor ya investigador lliterariu Antón García fizo esti miércoles un llamáu a romper col canon que, al so entender, el llamáu Grupu d'Uviéu, "con Leopoldo Alas Clarín al frente", entamó nel so día, "orientando la producción (lliteraria) en llingua asturiana hacia lo festivo y lo popular".
Na so ponencia, nel marcu de les Xornaes d'Estudiu de l'Academia de la Llingua Asturiana, García consideró qu'esa "tradición crítica" ye'l motivu de que se valorara a unos autores menores" (ente los que citó a Pepín de Quevedo o 'Anxelu') penriba d'otros que na so opinión tendríen que tener una mayor importancia, como por exemplu Enriqueta González Rubín, Fernán Coronas o Xuan María Acebal.
"Tovía siguimos falando de Pepín de Quevedo como un autor importante cuando ye bien menor", señaló. En contraposición, mentó a Enriqueta González Rubín, "una muyer estraordinaria, fundadora de la narrativa asturiana", qu'al so xuiciu nun tuvo la presencia que debería na historiografía lliteraria.
"Nesti momentu tenemos que repensar esa tradición crítica dende'l mesmu sistema lliterariu asturianu, revisar el canon, revisar la crítica tradicional, basanos na dinámica interna na mesma historiografía lliteraria asturiana de los últimos años y crear un canon nuevu y un sistema lliterariu propiu", consideró.
Según García, el Grupu d'Uviéu "marcó una llinia", la de que "la lliteratura asturiana nun merecía la pena que tuviera un gran desarrollu y debía de ser subsidiaria de la castellana". "Consideraben que taba bien que s'utilizara pa cuestiones festives", señaló'l ponente, refiriéndose a prólogos, crítiques y comentarios de los miembros del Grupu al respective de la obra n'asturianu.
