UVIÉU, 2 d'Ochobre (EUROPA PRESS)
El que fuera secretariu de Minería d'UXT y diputáu d'IX na Xunta Xeneral, Antón Saavedra, ta convocáu pol so antiguu sindicatu a una convención de delegaos que va tener llugar esti llunes en Pruvia, 19 años dempués de solicitar la so baxa del sindicatu ente dures crítiques lo mesmo a esta central como al SOMA.
Nel so perfil de Facebook, Saavedra esplica con ironía qu'esti pasáu 30 d'ochobre recibió la carta, roblada pol secretariu xeneral de UXT Asturies, Justo Rodríguez Braga, na que se-y convoca a la Convención de Delgaos qu'UXT va celebrar nel restorán La Torre de Pruvia, y a la que va asistir el secretariu xeneral de la organización, Cándido Méndez.
Saavedra pregúntase "¿qué clase de controles se lleven na afiliación y delegaos sindicales, nun siendo'l de la mentira permanente pa hinchar los censos según interese en cada momentu?".
L'exsindicalista solicitó la baxa como afiliáu d'UXT el 12 de febreru de 1996, dempués de comprobar que'l sindicatu siguía cobrándo-y la cuota correspondiente al SOMA, magar que pidiera un añu antes nun "cotizar" a "esa banda organizada", como definía a la organización minera.
