UVIÉU, 8 de Xunetu (EUROPA PRESS)
Tolos grupos parlamentarios sacante'l PSOE aprobaron esti martes el dictame definitivu de la Comisión d'Investigación del Niemeyer, centráu en determinar responsabilidaes polítiques ya irregularidaes na so xestión. En total imputóse a ocho responsables, ente ellos l'ex presidente del Principáu Vicente Álvarez Areces.
El presidente de la comisión, el 'popular' Alfonso Román, mostróse satisfechu col resultáu de los trabayos. "Acabaron con éxitu porque se cumplieron los oxetivos d'analizar irregularidaes na Fundación Niemeyer, ver les responsabilidaes existentes y ellaborar encamientos pa tratar qu'eses irregularidaes nun vuelvan asoceder nel futuru", apuntó en declaraciones a los medios.
En concreto, siete de los nueve miembros de la Comisión aprobaron el dictame, lo que significa, según Román, que nel plenu de la Xunta Xeneral nel que va votase'l dictame, va haber una "amplia mayoría" de votos a favor, con 29 de los 45 diputaos de Foru, PP, IU y UPyD.
Al respecto de la posición del PSOE mientres tol procesu de la Comisión, el diputáu del PP criticó la so oposición "dende'l principiu" a los trabayos d'investigación. "Trataron de bloquiar los trabayos", aseguró. La prueba más evidente, esclaró Román, ye que los socialistes entregaron mientres estos dos años de comisión los documentos requeríos "a remolera".
Tres l'acabación de los trabayos, los miembros de la comisión acordaron imputar a Vicente Álvarez Areces, a la conseyera de cultura mientres el periodu analizáu, Mercedes González, al director xeneral de Patrimoniu Cultural, José Luis Díaz Vega y al responsable de promoción cultural, Jorge Fernández León. Coles mesmes, requirieron al secretariu técnicu de la Conseyería, a la vicepresidenta del patronatu y alcaldesa d'Avilés, Pilar Varela, y d'últimes a los dos xestores del centru mientres el periodu 2007-2010, Luis Rebollo y Natalio Grueso. A estos xestores, esplicó Román, "nun se-yos esixen responsabilidaes polítiques porque nun tienen un cargu políticu, pero sí responsabilidaes nes irregularidaes de la xestión".
"Propunxéramos propuestu más persones, nun tán tolos que son pero sí que son tolos que tán", apuntó'l presidente de la Comisión.
