UVIÉU, 29 d'Abril (EUROPA PRESS)
El presidente del Gobiernu asturianu, Vicente Álvarez Areces, afirmó güei que les posiciones que defenden la oficialidá de la llingua asturiana "son minoritaries", y que la ciudadanía ta contenta como ta, porque ta pefectamentea asumida la defensa, la promoción y la inclusión de la llingua asturiana nel sistema escolar. Asina, consideró inxusto tamién que lu tachen de "tar opuestu a la llingua".
Mientres la so participación nel seminariu d'Emplegu de periodistes europeos, refirióse al asturianu como bable, porque "algún nun quier llamalu asina, yo sí". "Ta incorporáu nel nuesu Estatutu, el bable y les sos variantes. Hai posiciones que quieren más, pero son minoritaries", afirmó. Dende'l so puntu de vista, "la ciudadanía asturiana ta a gusto como ta porque tenemos perfectamente asumida la defensa, la promoción, la inclusión nel sistema escolar per vía voluntaria que foi un ésitu porque hai munchos miles d'alumnos qu'añu tres d'añu integráronse nel sistema educativu sin nengún conflictu".
Al so xuiciu, "esto ye un capital nel mundu nel que vivimos güei". "Nun quisimos les fuerces mayoritaries convertilu en llingua oficial pero proteximos el so usu, el so espardimientu y la so promoción y respetamos esa convivencia natural qu'hai", afirmó. Poro, ye bien inxusto pa él que lu califiquen "d'opuestu a esa llingua". Recordó asina que "acabamos de dignificar les instalaciones d'una institución que ta reconocida nel nuesu Estatutu -l'Academia de la Llingua-, pues yo creo quéesa ye la posición mayoritaria n'Asturies".
"Hai otres que quieren elevalu a llingua oficial y que tendríen tamién otres connotaciones", opinó, pero "la sociedá asturiana convive sin conflictu con esi tema". Recordó amás que "hai zones estremaes na fala". Por exemplu, "nel occidente d'Asturies fálase, como ellos quieren llamalo, la fala, que ye llendera col gallegu y hai una interrelación del gallegu col bable mui clara, que produz una zona diferente".
Acabó señalando que se siente "satisfechu" del so llabor, lo mesmo como cuando foi director d'Educación como na política d'estos once años, de facer una bona convivencia y un bon resultáu.
