UVIÉU, 20 Oct. (EUROPA PRESS) -
El coordinador xeneral d'IX afirmó que de cara a negociar los presupuestos del 2018, una de les primeres coses qu'escuchó a la dirección de la FSA nueva ye que "pela primer vez" queríen facer bandera "un pocu" de la nuestra llingua natural, "que ye l'asturianu".
Asina lo afirmó Argüelles esti vienres en rueda de prensa, onde'l coordinador xeneral d'IX señaló les midíes xenerales que propón la so formación pa negociar los presupuestos. Unes midíes onde l'asturianu ye la cuarta pata "pero non menos importante" xunto al gastu social, les polítiques d'empléu y la sostenibilidá ambiental.
Argüelles afirmó que "hai años" había mieu a que l'asturianu perdiérase "y nun se perdió, pero tovía nun hai recursos abondo y hai que trabayar muncho pol asturianu". Por too esto, propón, "que dientro de les posibilidaes de l'alministración", recuperar y fomentar el so usu y averalo "lo máximo" posible a la cooficialidá.
Asina, declaró que si hai que "suxerir" cambiar l'Estatutu d'Autonomía, "pues lo suxerimos y pidimos". "L'asturianu nun ye dalgo de pueblu y que namás se pueda usar pa falar en casa, ye la nuestra cultura, la nuestra llingua y nun tien qu'envidiar nada a otres llingües, polo tanto hai que facer apueste pol asturianu", comentó
Per otru llau, sobre'l cambiu de postura de la FSA-PSOE sobre la oficialidá, Argüelles sentenció qu'espera qu'esto suponga un cambiu d'actitú pa negociar midíes concretes pa la normalización de la nuestra llingua.
"Esperemos que sí, foi de les primeres coses qu'escuché a la dirección nueva de la FSA, que pela primer vez queríen facer bandera un pocu de la nuestra llingua", comentó, p'añadir que "el camín demuéstrase andando".
Por eso, anunció que la so formación ta en contactu cola Academia de la Llingua Asturiana "pa proponer coses concretes" y nos próximos díes podríen presentar "midíes concretes".
