MADRID, 28 de Xunetu (EUROPA PRESS)
El balance de finaos por mor de los enfrentamientos rexistraos ente milicianos islamistes y l'Exércitu libiu na localidá de Benghazi (esti) subió esti domingu a 38, según informó la cadena de televisión británica BBC.
Nes últimes dos selmanes, Libia sumióse nún de los periodos de mayor violencia dende'l conflictu que nel 2011 llevó al desmoronamientu del réxime de Muamar Gadafi.
A los enfrentamientos en Benghazi hai que sumar los combates ente milicies rivales pol control del Aeropuertu Internacional de Trípoli, que s'estendieron mientres les últimes dos selmanes dexando un balance de 97 muertos y 404 firíos.
Estaos Uníos decidió esti sábadu evacuar al personal de la so Embaxada, lo que llevó a los sos diplomáticos a cruzar la frontera con destín a Túnez, baxo fuertes midíes de protección polos combates rexistraos cerca de la sede de la legación en Trípoli.
Pela so parte, el Gobiernu español pidió a los sos ciudadanos que tovía permanezan en Libia qu'abandonen el país lo más pronto, dada la intensidá de los enfrentamientos en dellos puntos del país.
"Debíu al grave deterioru de la situación de seguridá en Libia, especialmente na capital, Trípoli, y la so comarca, encamiéntase bien seriamente a tolos españoles que tovía permanezan en Libia qu'abandonen el país darréu", indicó'l Ministeriu d'Asuntos Esteriores y de Cooperación, na última actualización de los sos encamientos de viaxe.
Coles mesmes, los enviaos especiales de la Unión Europea, la Lliga Árabe, Francia, Alemaña, Italia, España, Malta, Reinu Uníu y Estaos Uníos en Libia ficieron un llamáu pal altu'l fueu darréu, según informó esti domingu'l diariu 'The Libya Herald'.
"La situación en Libia ta llegando a un puntu críticu. Tamos fondamente preocupaos sobre l'aumentu de la violencia nel país y les sos consecuencies humanitaries", dixeron los enviaos especiales nun comunicáu conxuntu.
Los enviaos especiales afirmaron que la ONU debería de tener un papel importante na cooperación col Gobiernu libiu y "otros partíos internos" nel algame del acuerdu del altu'l fueu,.
Amás, apuraron al Gobiernu libiu a asegurar la seguridá de les misiones de la comunidá internacional en Libia. Tamién se dirixeron a la comunidá internacional a la que recordaron que tien que caltenese comprometida col apoyu de la unidá Libia, l'autonomía y la estabilidá y ficieron un llamáu al apoyu internacional al país mientres la so transición.
