Asturies concedió 181 avales a la financiación d'empreses nel 2009, por un importe de 104,7 millones d'euros

Rabanal señala que nel 2010 esploraránse nueves llinies de financiación del ICO pa dar el so apoyu a les empreses asturianes

UVIÉU, 8 de Febreru (EUROPA PRESS)

El Gobiernu d'Asturies concedió demientres el 2009 un total de 181 avales a la financiación d'empreses, que dan emplegu a 7.459 asturianos, por un importe de 104,7 millones d'euros. Eses cifres tratáronse güei demientres l'alcuentru que caltuvieron el conseyeru d'Economía y Facienda del Principáu, Jaime Rabanal, y el presidente del Institutu de Creitu Oficial (ICO), José María Ayala.

Según informó güei'l Gobiernu asturianu en nota de prensa tamién s'analizaron futuros acuerdos de financiación pal 2010 xunto al conseyeru d'Industria y Emplegu del Principáu, Graciano Torre.

Asina, los conseyeros destacaron güei que les diferentes llinies de meyora de la financiación al texíu empresarial promovíes demientres el 2009 pol Gobiernu asturianu, tanto les vinculaes al Presupuestu Xeneral como les tramitaes pola sociedá de garantía recíproca Asturgar, sumen un total de 181 avales por un importe global de 104,7 millones d'euros a empreses que dan emplegu directu a 7.459 asturianos.

El conseyeru d'Economía y Facienda apuntó que "a lo llargo del añu 2009 el Gobiernu autonómicu fizo un esfuerzu importante n'apoyu a la financiación de 104 millones d'euros y qu'afecta a más de 7.400 trabayadores".

Demientres l'añu 2009, Asturgar concedió 160 avales por importe de 32,2 millones d'euros, de los que 62 fueron de la nueva llinia de circulante por importe de 10,4 millones. Y dende xineru del 2009 a 31 d'avientu del 2009 formalizáronse 297 avales por un total de 30,4 millones d'euros, de los que 111 fueron de circulante por importe de 17 millones. Un 57,5% más d'avales concedíos que nel añu 2008.

A estos avales d'Asturgar hai que sumar los concedíos al traviés de la Conseyería d'Economía y Facienda, vinculaos al Presupuestu Xeneral, pa empreses de mayor tamañu, tanto pa la financiación de proyectos d'inversión, como pa la meyora de la estructura financiera empresarial y desarrollu de l'actividá. Demientres l'añu 2009 concediéronse 21 avales por un importe de 72,5 millones d'euros de los que yá tán formalizaos (a 31 d'avientu del 2009) 17 por un importe de 71,6 millones d'euros.

NUEVES LLINIES DE FINANCIACIÓN NEL 2010

El conseyeru d'Economía y Facienda refirióse tamién a la visita güei a Asturies del presidente del ICO, José María Ayala, p'analizar nueves víes de financiación de les empreses nesti exerciciu del 2010. "Nel añu 2010 vamos esplorar coles nueves llinies de financiación del ICO pa tentar d'alcontrar llinies d'apoyu a les empreses asturianes", apuntó Jaime Rabanal.

Esta futura collaboración tien como oxetivu la implantación efectiva y el desarrollu eficaz de les llinies de financiación ICO, asina como d'aquelles midíes que se xestionen pol Institutu dientro del Fondu d'Economía Sostenible puesto en marcha pol Gobiernu d'España.

De la mesma manera, estudiará la posibilidá de que l'ICO y el Gobiernu d'Asturies participen de manera conxunta y promuevan la participación d'otres entidaes de creitu, na financiación de proyectos realizaos por empreses españoles na comunidá autónoma. Dientro d'esti apartáu, prestaráse especial atención a los proyectos qu'impliquen innovación tecnolóxica, proteición del mediu ambiente, meyora de la competitividá de les empreses, apoyu a la so internacionalización o l'apoyu a grandes inversiones en sectores estratéxicos pa la economía.

Nos conceyos celegraos güei, tamién se prestó especial atención a la figura del 'Facilitador financieru', creada pol ICO col oxetivu de meyorar l'accesu al creitu d'autónomos y pymes, que vieren refugaos los sos pidimientos de financiación d'hasta dos millones d'euros per parte de les entidaes financieres.