UVIÉU/MADRID, 31 de Xunetu (EUROPA PRESS)
La Comunidá Autónoma de Canaries y el Principáu d'Asturies mostráronse otra vuelta contrarios al oxetivu de déficit que'l Gobiernu de Mariano Rajoy fixó pal 2014 nun 1% del PIB pa toles comunidaes, sorrayando que ye "mui restrictivu".
Asina se pronunciaron la conseyera de Facienda y Sector Públicu d'Asturies, Dolores Carcedo, y el conseyeru d'Economía, Facienda y Seguridá del Gobiernu de Canaries, Javier González Ortiz, antes d'asistir a la xunta del Conseyu de Política Fiscal y Financiera (CPFF) que se celebra esti xueves na sede del Ministeriu de Facienda.
Dambes comunidaes yá refugaron, xunto con Andalucía y Cataluña, el plan d'estabilidá pal periodu 2015-2017 que, ente otres midíes, establecía esti oxetivu de déficit pal 2014. Mientres l'alcuentru d'esti xueves, otra vuelta va analizase los oxetivos d'estabilidá presupuestaria y deuda pública pa caúna de les comunidaes autónomes pal exerciciu 2014 y pal periodu 2015-2017.
"Asturies ye contraria al oxetivu de déficit que s'impón porque consideramos que ye mui restrictivu en función de la estructura de gastu y del pesu que tien el gastu público nes comunidaes autónomes", atayó la conseyera del Principáu.
Nesti sen, la conseyera asturiana denunció que'l Gobiernu central "resérvase siempre la mayor parte d'esi déficit" y criticó que nun se conozan "los criterios nin la metodoloxía colos que s'aplica'l repartu vertical". Con éses, aseguró que la so comunidá esti xueves tamién va votar en contra de dichu oxetivu de déficit y pidió que s'amplíe a trés décimes del PIB y, d'esta manera, l'oxetivu suba al 1,3%.
"Ye bien difícil pa les comunidaes poder llegar a estos oxetivos de déficit y deuda", destacó, pa dempués añadir que, al so xuiciu, "hai que facer un repartu xustu y equitativu" ente l'Alministración central y les autonomíes.
