Asturies nun aplicará la contención de gastu n'Educación y Sanidá porque'l so plan d'axuste ye superior al exixíu

UVIÉU, 04 de Mayu (EUROPA PRESS)

El Gobiernu asturianu presentó al Gobiernu central un plan d'Axuste de 551,5 millones d'euros, unos 53,5 millones más que los 498 millones que, según les estimaciones de la Conseyería de Facienda, requiérense pa cumplir la llenda de déficit del 1,5% del PIB del 2011. Yera'l requisitu esixíu pol Gobiernu central pa que la Comunidá s'acueya al plan de pagu a proveedores. Asina, l'executivu autonómicu descarta la necesidá d'aplicar les midíes de contención de gastu aprobaes pol Estáu en materia de Sanidá, Educación y Alministraciones Públiques.

Los datos ofreciólos esti vienres el conseyeru de Facienda, Ramón del Riego, nuna rueda prensa na que dio cuenta del Plan d'Axuste enviáu al Gobiernu central, pa poder acoyese al mecanismu pa la financiación del pagu a proveedores.

Concretamente, el Gobiernu autonómicu fixó los gastos nel presupuestu pa reducilos en 551,1 millones d'euros. Según los cálculos de Facienda, pa cumplir el techu del 1,5% del PIB, habría que reducir el déficit de 843 millones nel 2011 a 345 millones nel presente exerciciu, llogrando un axuste de 498 millones. Poro, "tamos penriba de lo que tenemos que retener", señaló'l conseyeru, p'anunciar de siguío que "el Gobiernu nun va acoyese a les midíes de contención de gastu en materia de Sanidá, Educación y Alministración Pública".

NON TRAMITACIÓN DE LA LLEI D'ENDEUDAMIENTU

Según del Riego, la mayor parte del axuste en gastos ye cosecuencia de la non tramitación de la Llei d'Endeudamientu que'l Gobiernu autonómicu propunxo en febreru, y que traxo la non realización d'inversiones por cerca de 450 millones d'euros, partíes que permanecen reteníes. "Si nun s'executen estos gastos d'inversión, na midida na qu'existen munchos ingresos afectaos, vamos dexar de percibir unos 245 millones d'euros en materia de fianciación afectada", lo que supón que la non tramitación de la Llei conlleva una inversión neta en gastos d'inversion de más de 204 millones d'euros.

La otra parte de gastos reducíos provién de los previstos nel presupuestu 2011, nestos momentos prorrogáu, y que yá s'executaron (309 millones), y de delles baxaes, como les de gastos corrientes en bienes y servicios, y funcionamientu d'organismos públicos.

Pela parte de los ingresos, señálase un axuste de -529 millones d'euros, ente los que figuren los 245 millones que nun se percibiríen, derivaos de les inversiones vinculaes a la propuesta d'endeudamientu, o los 233 millones menos de fondos mineros, impuestu de tresmisiones o venta de viviendes.

"L'axuste yá ta adoptáu nel momentu en que nun se tramita'l Proyectu de Llei d'Endeudamientu", xustifica Del Riego. Amás d'ello, "como nun tenemos que faer axustes, el Gobiernu d'Asturies nun s'acueye a nenguna de les midíes de contención de gastu establecíes nos reales decretos, en materia d'Alministraciones Públiques, Contención y Sanidá", acaba'l responsable autonómicu.