UVIÉU, 16 Feb. (EUROPA PRESS9
El conseyeru d'Infraestructures, Ordenación del Territoriu y Mediu Ambiente del Gobiernu asturianu, el socialista Fernando Lastra, solicitó esti vienres la eliminación del peaxe del Güerna, el pagu que se realiza pa poder circular pela autopista AP-66, que xune Asturies con Llión.
En declaraciones a los periodistes nos pasiellos de la Xunta Xeneral del Principáu d'Asturies (XXPA) , Lastra refirióse a la enmienda anunciada pol PP a nivel nacional pa nun prorrogar les concesiones de les autopistes de peaxe que vencen ente 2018 y 2021 y caltener nel sector públicu eses autopistes. Lastra saludó esa enmienda, pero dixo que caltener el peaxe nel Güerna supondría entós "un agraviu"
Recordó que la concesión del peaxe del Güerna foi prorrogada nel añu 1999 por decisión del entós ministru de Fomentu col PP, Francisco Álvarez-Cascos, obligando a los usuarios de la vía a pagar 29 años más, dende'l 2021 al 2050.
Por eso, Lastra considera que'l peaxe del Güerna tendría que desaparecer si se fai lo propio con otros. "Si España ta llibre de peaxes, Asturies va tener que tar tamién", declaró. Asina, esplicó que'l grupu socialista na Xunta Xeneral del Principáu d'Asturies va impulsar una iniciativa pa sumar les posiciones de los distintos grupos políticos y reclamar la supresión del peaxe.
