UVIÉU, 20 de Xunetu (EUROPA PRESS)
La conseyera de Facienda del Gobiernu asturianu, Dolores Carcedo, dexó claro que l'Executivu va refugar la eliminación del actual 'statuo quo' de les comunidaes que más financiación reciben (Asturies, ente elles), si la midida nun se compensa cola introducción d'otres variables que recueyan el costu de los servicios públicos nel futuru sistema de financiación. Amás, mostró la oposición del so Executivu a la posible quita de deuda pa delles comunidaes, por entender que pue perxudicar a les que cumplieron colos techos de déficit.
Carcedo ofreció una rueda de prensa xunto con Roberto Fernández Llera, el representante de l'Alministración asturiana na Comisión d'Espertos que ta ellaborando un informe técnicu sobre'l futuru sistema de financiación ente Comunidaes Autónomes.
La Comisión celebró esti miércoles la so última xunta y yá acabó'l so informe, que tovía tien calter provisional. Sobro él van tener qu'aldericar los representantes políticos. Esti xueves l'espertu y Carcedo celebraron una reunión con representantes de los grupos políticos de la Xunta Xeneral pa esplicar cuestiones relacionaes col documentu.
Carcedo mostróse prudente hasta conocer la redacción definitiva del informe, que de primeres incluyiría la eliminación de dichu 'statu quo'. Sicasí, defendió esi 'statu quo', sacantes "l'informe fale de que se va eliminase progresivamente porque otres variables van recoyer el costu de los servicios". Nesti sen, añadió que toles comunidaes coinciden en que "el modelu actual ye insuficiente pa cubrir el costu de los servicios públicos, polo que "precisamos más, nun podemos perder sobre la financiación actual, porque ye insuficiente".
Añadió amás que según el referíu 'statu quo', l'estáu trespasaba los fondos en función de lo que costaba caltener los servicios públicos en cada comunidá, polo qu'inclúi "les diferencies nel gastu".
Unu de los puntos polémicos, según Llera, foi l'endeudamientu. L'espertu asturianu mostróse favorable a buscar mecanismos de reestructuración d'esa deuda (en condiciones de préstamos o tipos d'interés, por exemplu), pero refugó la posibilidá de les quites, que sí plantegaron otros representantes autonómicos.
Nesti sen, la conseyera foi tayante: "hai qu'analizar l'endeudamientu de manera global, dientro d'un órganu multillateral como'l Conseyu de Política Fiscal y Financiera. "Nun pue favorecese a unes comunidaes y perxudicar a otres", señaló. Dexó claro que nun van aceptar nenguna quita que perxudique a Asturies, y recordó que los fondos de financiación estatales yeren "fondos voluntarios, asina que nun puen ser l'instrumentu pa decidir sobre quites de deuda".
Per otra parte, Llera señaló qu'existe consensu en dellos aspectos, ente ellos l'harmonización d'un tipu mínimu común de tributación nos impuestos de Sucesiones y Patrimoniu pa toles Comunidaes Autónomes. Tamién hubo un acuerdu xeneral no que cinca a la necesidá de reforzar los mecanismos de compensación y el Fondu de Compensación Interterritorial, que nesti momentu cuenta con 400 millones y del qu'Asturies percibe unos 13.
