Asturies recibe los medios personales de Xusticia y completa'l trespasu d'esta competencia que yá tienen once CC.AA

UVIÉU, 20 de Payares (EUROPA PRESS)

El Principáu d'Asturies recibió esta tarde del Gobiernu central el trespasu de los medios personales al serviciu de l'Alministración de Xusticia, 1.205 puestos de trabayu que de magar agora van depender de la Comunidá Autónoma. El coste de la tresferencia ascienda a 32,78 millones d'euros y el Principáu torna asina na décimo primer CC.AA qu'asume esta competencia.

L'acuerdu firmólu esta tarde nel Ministeriu d'Alministraciones Públiques tres un conceyu de la Comisión Mista de Tresferencies ente l'Estáu, representáu pol citáu Ministeriu y pol de Xusticia y el Gobiernu asturianu, del que fueron los conseyeros d'Alministraciones Públiques, Ana Rosa MIgoya, Economía, Jaime Rabanal, Infraestructures, Política Territorial y Vivienda, Francisco González Buendía y Presidencia, Xusticia y Igualdá, María José Ramos.

Amás de completar esti trespasu de Xusticia, Estáu y Comunidá Autónoma acordaron que'l primeru entregó a la segunda 8 millones d'euros pa financiar inversiones en nueves teunoloxíes, construyir y equipar l'Institutu de Melecina Llegal d'Uviéu y p'arreglar los xulgaos de Villaviciosa.

"LA MEYOR UNIDÁ DEL MINISTERIU"

El ministru de Xusticia, Mariano Fernández Bermejo, espresó la so satisfaición por que seya l'Executivu autonómicu'l responsable de xestionar tamién los medios personales, dempués de que nel 2006 recibiere yá la parte de la competencia relativa a los medios materiales de l'Alministración de Xusticia. "Algamamos rematar dalgo no que llevamos munchu tiempu trabayando, ye un acuerdu bonu pa la Xusticia d'esti país", afirmó.

Bermejo aseguró que la Xusticia nel cordal cantábricu, pero n'especial n'Asturies, ye "una de les meyores unidaes del Ministeriu", porque caltién un porcentaxe altu de xueces por númberu d'habitantes, y niveles de conflictividá "baxos".

El ministru respasó la llista de Comunidaes que yá exercen esta competencia y que sumen 11. Aseguró que tán en distintos graos d'adelantu les negociaciones con La Rioxa, Murcia, Castiella La Mancha, Castiella Lleón y Isles Baleares y que la selmana pasada, Estremadura dio'l vistu bonu al so Ministeriu pa entamar les conversaciones sobre'l trespasu.

Mariano Fernández Bermejo auguró que'l 2009 "va ser un añu de muncha intensidá negociadora" con toes estes CC.AA. "Y ye probable que nel 2010 podamos rematar tanta cosa como tenemos abierta", acabó.