Asturies rexistra un superávit de 137 millones d'euros hasta abril, el 0,62% del PIB rexonal

UVIÉU/MADRID, 18 de Xunu (EUROPA PRESS)

La comunidá autónoma d'Asturies rexistró un superávit de 137 millones d'euros nos cuatros primeros meses d'esti añu, el 0,62 por cientu del PIB rexonal, según los datos publicaos pol Ministeriu de Facienda y Alministraciones Públiques.

Mientres, el déficit del Estáu asitióse en 22.778 millones d'euros nel mesmu periodu, el 2,16 por cientu del PIB, acordies coles cifres ministeriales, que nun inclúin les correspondientes a les entidaes llocales.

D'esta manera, Asturies ponse a la cabeza dientro del grupu de cinco comunidaes qu'atroparon superávit hasta abril, xunto con País Vascu (+113 millones, el 0,17%), La Rioxa (+33 millones, el 0,42%), Cantabria (+14 millones, el 0,11%) y Estremadura (14 millones, el 0,08%).

En concreto, nel desglose por comunidaes autónomes, doce d'elles rexistraron déficit nos cuatro primeros meses, con Cataluña a la cabeza, al rexistrar un saldu negativu de 920 millones, el 0,46% del PIB, siguíu de Madrid, con 643 millones d'euros (0,34% del PIB).

De siguío figuren Andalucía (-503 millones, el 0,36% del PIB), Navarra (-245 millones, el 1,35%), Castiella y Lleón (-197 millones, el 0,36%), Murcia (-188 millones, el 0,69%), Galicia (-115 millones, el 0,2%), Aragón (-113 millones, el 0,34%), Canaries (-103 millones, el 0,25%), C. Valenciana (-47 millones, el 0,05%), Castiella-La Mancha (-30 millones, el 0,08%) y Baleares (-4 millones, el 0,01%).

Sicasí, rexistraron superávit Asturies (+137 millones, el 0,62% del PIB), País Vascu (+113 millones, el 0,17%), La Rioxa (+33 millones, el 0,42%), Cantabria (+14 millones, el 0,11%) y Estremadura (+14 millones, el 0,08%).