Asturies ye una de les CCAA con menor tasa de probeza, con un 12,3%

IVE/EUROPA PRESS

UVIÉU/SEVILLA, 24 de Febreru (EUROPA PRESS)

Asturies ye una de les comunidaes autónomes con menor tasa de probeza, con un 12,3 por cientu nel añu 2010, según recueye la Confederación oficial de les entidaes d'acción caritativa y social de la Ilesia católica n'España (Cáritas) mientres la presentación del primer Informe d'Esclusión y Desarrollu Social de la organización.

L'informe, denomináu 'Esclusión y Desarrollu Social' y ellaboráu pola Fundación d'Estudios Sociales y Socioloxía Aplicada (Foessa( y Cáritas, revela "la meyora de la tasa de probeza de la encuesta del 2011 y que, según la estimación, la proporción de llares perbaxo de la llenda de probeza ye cercana al 22 por cientu n'España".

Amás, apunta que la llenda de probeza pa una persona sola nel 2010 foi de 7.800 euros, lo que supunxo "un descensu" sobre'l añu anterior, cuando la llinia averábase a los 8.000 euros, a nivel estatal. Esti crecimientu de la probitú concentróse especialmente nos cases con sustentadores principales mozos y nes families con menores.

Per otru llau, l'informe, al que tuvo accesu Europa Press, esplica que'l riesgu de probeza sigue materializándose de forma distinta nel territoriu español, con una marcada concentración nel suroeste peninsular y en Canaries.

Asina, nel añu 2010, la comunidá autónoma con mayor tasa de probeza, Estremadura (38,2%), superaba a Navarra (7,3%), la comunidá con menor incidencia d'esti problema, en más de 30 puntos porcentuales.

Pela so parte, Canaries ye la segunda autonomía con mayor tasa de probeza ente la so población, con un 31,1%, siguida d'Andalucía, col 30,1 por cientu. D'otra manera, contrastes les tases de Navarra, siguida del País Vascu (11,6%) y Asturies (12,3%).

L'informe apunta qu'España tornó nel país de la Unión Europea (UE) nel que más aumentaron les diferencies ente ricos y probes del 2006 al 2010, asina como que la distancia correspondiente al 20 por cientu más ricu de la población y al 20 por cientu más probe pasó d'un valor de 5,3 nel 2007 a otru de 6,9 al cabu del 2010. Esti aumentu, comparáu colos países de mayor renta de la UE, dobló'l rexistráu en Francia, triplicó'l d'Alemaña y foi casi cinco veces mayor que'l de la media de la UE-15.

El secretariu xeneral de Cáritas, Sebastián Mora, mientres la presentación del informe esta selmana calcó nesta fienda abierta ente ricos y probes, alertando del riesgu de polarización de la sociedá y de "cohesión social", al entender qu'esta situación "va enzancar qu'estos grupos, con distintos derechos, cohabiten".

Amás, xustificó "l'esfuerzu presupuestariu" que lleva faciendo Cáritas mientres los últimos años y que llevó a atender a cerca de 1,5 millones de persones nel añu 2010 n'España, una cifra un 20 por cientu superior a la rexistrada nel añu anterior.

D'esta forma, Mora anque señaló que la organización "nun debe, nin quier, sustituyir a les alministraciones públiques nos llabores sociales que tienen qu'asumir", anunció que la estimación de cara al 2011 ye que se caltenga esi aumentu del 20 por cientu na atención a persones precisaes.