Ateos de Madrid piden espacios n'autobuses pa esparder mensaxes contra la existencia de Dios, igual qu'en Barcelona

MADRID, 7 de Xineru (EUROPA PRESS)

La Unión d'Ateos y Llibrepensadores (UAL) y la so asociación madrilana AMAL solicitó a la Empresa Municipal de Tresportes espacios publicitarios en dos autobuses municipales pa enseñar mensaxes a la escontra de la existencia de Dios, tal y como ficieron en Barcelona col eslogan 'Probablemente Dios nun exista. Dexa de preocupate y disfruta de la vida'.

Asina lo confirmaron güei a Europa Press fontes de PubliSistemas, la empresa encargada de la publicidá esterior de los autobuses muncipales de Madrid, que señalaron qu'hai unos díes-yos foi comunicada esta propuesta.

Según la empresa, los carteles, qu'encamienten a los ciudadanos a despreocupase de la relixón y disfrutar de la vida, van salir alantre si cumplen cola Llei Xeneral de Publicidá. Sicasí, aseguraron que la EMT, dependiente del Conceyu de la capital, va tener que dar el vistu bonu a la mesma "anque tamién se deben guiar polo que dicta dicha llei".

L'artículu 3 del títulu II de la Llei Xeneral de Publicidá especifica como publicidá illegal la qu'atente escontra la dignidá de la persona o imcumpla los valores y derechos reconocíos na Constitución, especialmente a los que se refieren los sos artículos 18 y 20, apartáu 4, que garanticen, ente otros, el derechu al honor y a espardir llibremente los pensamientos.

Fontes municipales, consultaes por Europa Press, unviaron l'asuntu a PubliSistemas, anque indicaron que cualquier que quiera esponer publicidá nos sos autobuses tien de cumlir un pliegu de condiciones.

DOS AUTOBUSES COMO EN BARCELONA

La Unión d'Ateos va basar la so campaña na entamada'l pasáu 12 de xineru en Barcelona, onde circulen dende entós dos de los sos más céntricos autobuses municipales. La campaña tien l'oxetivu de recaudar fondos pa introducir más carteles en Madrid y otres ciudaes d'España, tal y como asegura l'asociación na so páxina web. De momentu, recudaron 6.440 euros.

De fechu, l'asociación ta a la espera de la respuesta de PubliSistemas y de la EMT pa entamar la campaña, que va durar 15 díes y que pretende ser visible na zona centru de Madrid al traviés de dos autobuses que cubran trayeutos d'esti distritu. De momentu, na so páxina web yá pue vese un fotomontaxe de los carteles a favor del ateísmu sobre típicos autobuses municipales madrilanos.

La campaña cuenta col apoyu de la British Humanist Association (BHA) que, col apoyu a la so vez del profesor Richard Dawkins, el conocíu biólogu evolucionista, autor de 'L'espeyu de Dios', llanzó la campaña inicial en Londres y otres ciudaes ingleses col oxetivu de sensibilizar a los ciudadanos ateos, creyentes y llibrepensadores en xeneral sobre la necesidá de "facese visibles pa reivindicar los mesmos derechos y llibertaes que se reconocen a los demás ciudadanos pol fechu de poseer o manifestar unes creencies relixoses".

La Unión d'Ateos y Llibrepensadores y les sos asociaciones federaes, en collaboración col BHA y el movimientu atéu internacional, pretende con esta aición dar a conocer l'ateísmu, promover la reflexón individual, potenciar la confianza nel poder de la conocencia, nel esfuerzu d'autosuperación, na capacidá pa tresformar la naturaleza cola prudencia necesaria pa caltener l'equilibriu ecolóxicu, na intelixencia del ser humanu pa crear un sistema moral y pa organizar la sociedá en base a la razón y la xusticia, la coooperación y la solidaridá.

"Con esta iniciativa queremos, en suma, contribuyir a animar l'alderique social, porque na respuesta a estes cuestiones s'alcuentra la nuesa propia concepción del ser humanu y de los valores fundamentales implicaos na construcción de la sociedá", señaló l'asociación.

"La relixón ta avezada a coses de baldre: lliberación d'impuestos, respetu non ganáu y el derechu a llavar el cerebru de los nuesos neños. Pienso qu'esta campaña va poner a la xente a pensar, y pensar ye un anatema de la relixón. Vemos tantes campañes de salvación al traviés de Jesús amenazándomos col castigu etenernu que toi seguru de qu'una campaña como ésta va ser recibida como una bocadiella d'aire frescu y si amás de poner a la xente a pensar la fai sonrir, pues mucho meyor", añadió Dawkins.