MADRID, 26 de Xunetu (EUROPA PRESS)
Polo menos 19 persones morrieron y decenes resultaron firíes nun ataque con arma blanca que tuvo llugar a primer hora d'esti martes nun centru pa discapacitaos na ciudá de Sagamihara, al suroeste de Tokio, según informaron dellos medios niponos.
El responsable del ataque, identificáu como Satoshi Uematsu, de 26 años, alcuéntrase baxo custodia policial, dempués de que s'entregare a les autoridaes de la prefectura de Kanagawa reconociendo ser l'agresor sobre 03.00 de la mañana, según l'axencia xaponesa Kiodo.
Nun entamu, l'ataque saldaríase con 15 muertos y una trentena de firíos graves, de los que cuatro nun presentaben signos vitales. Sicasí, l'axencia Kiodo confirmó qu'estos cuatro nun superaron les sos feríes, polo qu'aumenta la cifra de muertos a 19.
El balance de mancaos ye tovía imprecisu. Magar Kiodo apunta a 24 firíos --habría de primeres 28, ente ellos los cuatro qu'a lo último morrieron--, la cadena de televisión nipona NHK asegura qu'una ventena de persones resultaríen firíes, magar nun entamu informó d'unos 45.
La Policía aseguró que l'autor del ataque ye un antiguu empleáu del centru Tsukui Yamayuri En. Otru trabayador de les dependencies foi quien llamó a emerxencies sobre les 02.30 de la mañana, alertando qu'un home con un cuchiellu entrara nes instalaciones.
