UVIÉU, 07 de Payares (EUROPA PRESS)
Bloque por Asturies de Siero denunció esti llunes ante les instituciones (Conceyu de Siero, Conseyería de Cultura y Ministeriu de Fomentu) la utilización de topónimos que "yá nun son oficiales" nes indicaciones de los enllaces cola Autovía del Cantábricu. Algunos d'ellos son Pola de Siero (La Pola Siero) o Gargantada (Gargantá).
Al traviés d'un escritu enviáu a estes alministraciones, señálase que "tán realizándose enllaces de varies víes de comunicación cola Autopista del Cantábricu. Nos lletreros que se tán colocando apaecen varies veces nomes que yá nun son oficiales": "Pola de Siero", "Gijón", "Langreo" y "Gargantada".
"Los decretos d'oficialización de la toponimia de Langreo / Llangréu y Gijón / Xixón son tovía anteriores al de Siero (25 de xunetu del 2005 nel casu del primer conceyu y del 20 de setiembre del 2006 pal segundu). Dende eses feches los únicos nomes oficiales son: La Pola Siero, Langreo / Llangréu, Gargantá y Gijón / Xixón", añade la formación..
Pa BA, "en tou casu dende instancies oficiales nun se pue alegar inorancia pa incumplir un decretu del Principáu regulando un tema de la so competencia". Per otru llau, la organización considera que "ye tan fácil como consultar la información que l'Institutu Nacional d'Estadística tien na so páxina web oficial. Dende Siero encamentamos al Ministeriu de Fomentu pa que s'informe y nun repita errores d'esti tipu nel futuru".
