MADRID, 30 d'Ochobre (EUROPA PRESS)
La presidenta de Chile, Michelle Bachelet, faló esti xueves ante'l Plenu del Congresu de los Diputaos, onde espunxo'l programa de reformes qu'entamó nel so país y que busca responder a les demandes de los chilenos, que como n'España, salieron a les cais pa pidir "un desarrollu más igualitariu".
"Hai una traza común na historia reciente de los nuesos dos países", empezó Bachelet, que señaló que'l movimientu de los "indignaos" que nació n'España na Puerta de Sol tamién se produxo en Chile.
"Hai un malestar cola manera en que les nueses sociedaes desarrollen les relaciones sociales, polítiques y financieres y cola esclusión que munches veces eso provoca. A poques cais d'equí, na Puerta del Sol, miles d'españoles manifestaron el so descontentu y la so demanda d'inclusión", demandes asemeyaes anque con distintes especifidaes a les plantegaes en Chile por estudiantes, ecoloxistes y trabayadores, indicó.
Bachelet, que ta de visita d'Estáu n'España, esplicó que nel casu chilenu esi descontentu ye consecuencia de la "dicotomía" ente les meyores llograes --Chile algamó l'ingresu per cápita más altu de la rexón-- y les esclusiones sociales pendientes de resolver, y qu'afecten a los sectores de la población más vulnerables, pero tamién a una clase media qu'espresa "con puxanza les sos demandes" porque siente que Chile "pue dar más".
Eses desigualdaes pendientes, asegura Bachelet, suponen una torga p'avanzar hacia "una democracia más sólida". "Nin les notables meyores llograes con tantu esfuerzu van poder dar los sos frutos si nun superamos los llastres de desigualdá porque sin mayor igualdá la democracia va ser débil", alertó.
