UVIÉU, 25 Oct. (EUROPA PRESS) -
El filólogu y espertu en toponimia asturiana Fernando Álvarez-Balbuena afirma que la oficialización y usu de la toponimia asturianu supón el cumplimientu de la llexislación, "polo tanto, los que s'oponen al so usu tán posicionándose a favor d'incumplir la llei". Asina, Balbuena defendió l'usu del topónimu tradicional 'Cuideiru' pa referise a la villa del Occidente asturianu.
En declaraciones a Europa Press, el profesor de la Universidá d'Uviéu y miembru de la Xunta Asesora de Toponimia del Principáu d'Asturies opinó sobre'l decretu de toponimia de Cuideiru, que nestos momentos ta pendiente d'alegaciones enantes de que'l Conceyu decida la so aprobación y que los nomes de llugar tradicionales del conceyu pasen a ser oficiales.
Pal especialista, dicir que'l topónimu de Cuideiru vien de Galicia y que nun ye una forma tradicional asturiana "ye una babayada ensin nenguna base filóloxica". Balbuena afirma que declaraciones d'esti tipu muestren una "inorancia total" de la realidá llingüística del asturllionés occidental, "que comparte delles característiques col gallego-portugués, pero dicir eso ye opinar de lo que nun sabe".
Asina, el filólogu esplica que Cuideiru ye un topónimu que tovía ta n'usu en tola villa y nel restu de la mariña del conceyu, amás d'en Pravia, en Salas y en tolos conceyos vecinos. "Nun ye una forma particularmente local, ta emparentada con otres formes asemeyaes qu'usen los vaqueiros y que s'usa na zona de L.luarca", sentencia.
Por eso, esplica qu'hai dellos topónimos tradicionales que puen tener poca vitalidá, "pero nun ye'l casu de Cuideiru que s'usa con normalidá ente la xente", y añade que'l so usu "nun ye un rescate del pasáu, ye una realidá". Asina, comenta que según les sos propies investigaciones, 'Cuideiru' ye un deriváu d'una palabra llatina que significa piedra, "polo que Cuideiru ye pedreru".
Sobre les polémiques rellacionaes col usu de la toponimia y la posibilidá de que los turistes nun sepan llegar a una localidá al adaptar el topónimu nos indicadores de carreteres, Balbuena afirma qu'esto nun ye un argumentu. "Ye un tópicu, porque naide en nengún sitiu conoz turistes que se perdieren por eso, ye una babayada de los que nun tienen argumentos de pesu", sentencia'l filólogu.
Asina, señala que n'Asturies existe la Llei d'Usu y Promoción del Asturianu, aprobaba na Xunta Xeneral en 1998, "de la que naide s'alcuerda". Una llexislación que ta permitiendo que "pasín a pasu" tea recuperándose la toponimia tradicional asturiana, "polo qu'esto nun ye namás que cumplir la llei".
El profesor de la Universidá d'Uviéu recordó que nos Premios Princesa, el presidente del Parllamentu européu, Antonio Tajani, dixo qu'había que cumplir la llei "y tol mundu aplaudió". "Parez que si miramos pa casa, el cumplimientu de la llei nun ye una necesidá imperiosa. Los que s'oponen al usu de la toponimia tán posicionándose a favor d'incumplir la llei", sentencia l'espertu.
Por eso, afirma que les polémiques rellacionaes cola oficialización de la toponimia asturiana y el so usu tienen un sentíu "retardatariu". "Hai xente a la que nun-y presta la llei y nun quieren que l'asturianu avance, quieren ralentizalo y dificultalo, mesmamente con mentires malsanes", opina. Asina, diz qu'esti "afán de retardar les coses" retroalimentase ente'l mesmu Gobiernu autonómicu y dellos medios de comunicación, "que faen pinza".
