MADRID, 17 d'Abril (EUROPA PRESS)
El secretariu xeneral de Naciones Uníes, Ban Ki Moon, fizo esti xueves un llamáu a un altu'l fueu inmediato a toles partes en conflictu en Yemen, al tiempu que reclamó la creación de corredores humanitarios nel país.
"Pido un altu'l fueu darréu. Los saudinos --qu'encabecen la coalición internacional contra los milicianos huthis-- garantizáronme qu'entienden que tien qu'haber un procesu políticu. "Pido a tolos yemeninos que participen de bona fe", añadió, tal como recoyó l'axencia británica Reuters.
"El procesu diplomáticu apoyáu por Naciones Uníes en Yemen ye la meyor forma d'evitar una guerra con terribles implicaciones pa la estabilidá rexonal", valoró Ban, malpenes unes hores dempués de que'l so unviáu especial al país anunciara la so dimisión, a la que nun se refirió.
Benomar promovió un plan de transición política nel 2011 destináu a acabar col enguedeyu políticu en Yemen. Sicasí, el plan foi esmangándose, rematando na actual campaña de bombardeos contra los rebeldes chiínos.
Fontes diplomátiques occidentales aseguraron que los países del Golfu consideren que Benomar mostrárase descomanadamente conciliador colos milicianos chiínos, contra los qu'una coalición de países árabes entamó una ofensiva va delles selmanes.
El sustitutu de Benomar podría ser el diplomáticu mauritanu Ismail Uld Cheij Ahmed, que foi coordinador pal desarrollu de la ONU en Siria ente'l 2008 y el 2012 y en Yemen ente'l 2012 y el 2014.
Darréu, nomáronlu parte del equipu especial de Naciones Uníes pa Libia nel 2014, mesmu añu nel que foi puestu al mandu de la misión de respuesta ante'l biltu d'ébola n'África Occidental.
