UVIÉU, 28 de Payares (EUROPA PRESS)
La Conseyería de Facienda y Sector Públicu va entamar nos próximos díes los trabayos de rehabilitación del antiguu chigre La Cabaña, ubicáu na Ciudá de Vacaciones de Perlora, nel entornu de la playa de Güelgues. Les obres cuenten con un presupuestu d'axudicación de 151.574 euros y un plazu d'execución de trés meses y mediu. La previsión ye que'l llocal, que va esplotase en réxime de concesión, reabra les sos puertes na primavera del añu qu'entra.
L'actuación va consistir, ente otres meyores, na rehabilitación de la estructura y la fachada del edificiu, la reforma del circuitu eléctricu, l'adecuación de la fontanería y saniamientu, y la instalación d'un sistema d'estracción d'aire. El recintu tien una superficie de casi 300 metros cuadraos.
Les obres de rehabilitación del antiguu chigre La Cabaña formen parte de les actuaciones que'l Gobiernu del Principáu ta llevando a cabu dende últimos del 2013 na ciudá de vacaciones coles mires de que los visitantes del complexu puean disfrutar d'unes instalaciones más segures, modernes y accesibles.
