Baragaño (USO) piensa que "más valía la pena" nun reformar l'Estatutu, pola falta d'oficialidá y derechos ciudadanos

Iglesias (IX) señala la importancia xurídica de los derechos y niega que'l Constitucional prohíba reconocelos a les autonomíes

UVIÉU, 16 de Xunetu (EUROPA PRESS)

El secretariu xeneral d'USO Asturies, Francisco Baragaño, criticó güei duramente los acuerdos algamos ente PP y PSOE sobre la reforma del Estatutu d'Autonomía, la cual consideró que va consistir en "retocar lo mínimo" por non incluyir la oficialidá, la reconocencia del títulu de nacionalidá histórica y el capítulu de derechos ciudadanos demandáu por Izquierda Xunida-Bloque por Asturies-Verdes. "Pa eso más valía la pena nun entamar", sentenció.

Baragaño realizó estes manifestaciones nuna rueda prensa celebrada tres un conceyu que caltuvo con representantes de la coalición progresista. Xunto a él declararon Jesús Iglesias, voceru d'IX, y Rafa Palacios, voceru del Bloque por Asturies.

Tres esclariar qu'IX-BA-Verdes "tuvo la decencia de contar con nós, non como otros partíos", Baragaño afirmó que la reforma estatutaria nun va ser tala. Pa USO'l testu tien de recoyer dos temes "incuestionables", como son la oficialidá de la llingua y la reconocencia d'Asturies como nacionalidá histórica.

Sobre'l primeru d'estos asuntos, dixo nun entender "cómo nun s'asume la propuesta presentada pol Conceyu Abiertu pola Oficialidá (CAO), y cómo se niega un derechu, un mou de vida y un rasgu de la nuesa cultura". Sobre l'otru aspeutu, afirmó qu'Asturies tien "más historia que'l restu de comunidaes consideraes históriques".

Amás, criticó la non inclusión del capítulu de derechos ciudadanos demandáu por IX, "los cuales se desvirtúen tornándolos en principios rectores".

Al so xuiciu, esta reforma supón "retocar lo mínimo y pa eso más valía la pena nun entamala". "Ficímoslo los últimos y garrando lo peor de toos", añadió.

NUN HAI INCONSTITUCIONALIDÁ.

Iglesias aprovechó esti momentu pa desmentir les afirmaciones del voceru del PSOE na Xunta'l Principáu, Fernando Lastra, según les cuales el Tribunal Constitucional declcarare la imposibilidá de que los estatutos d'autonomía recueyan derechos ciudadanos.

"El TC nun declaró la inconstitucionalidá de los Estatutos que recueyen esos derechos, simplemente fizo una interpretación sobre l'algame d'eses declaraciones de derechos", matizó Iglesias. "El d'Asturies podía tener un títulu que los espeyare", añadió.

Según Iglesias, "la doctrina del TC pue evolucionar, y si dientro de cuatro años interpretaren d'otra manera eses declaraciones de derechos, mos alcontrábemos con que los estatutos que los tienen espeyaos tendríen esos derechos al 100%". "Asturies, que por voluntá del PP y PSOE, nun tien reconocíos esos derechos, quedaría descolgada del restu del Estáu", afirmó.

Amás, señaló la "importancia" del términu derechu no xurídico. "Si'l nuesu Estatutu espeyare ente los derechos de los asturianos tener un salariu social o renta básica, y viniere otru Gobiernu a suprimir la llei que lu regula o a modificala, alcontraríase con que nun podría porque l'Estatutu recueye esi derechu", matizó. "Esos derechos", al so xuiciu, "suponen un mandatu imperativu hacia l'Executivu".

LA LLUCHA POL ASTURIANU "VA SIGUIR".

Rafael Palacios, pela so parte, aseguró que "pase lo que pase, y faigan lo que faigan PSOE y PP, la llucha pola oficialidá del asturianu va siguir y l'asturianu tarde o tempranu va ser oficial". "Pasará Areces, pasará Lastra y pasará Fernández (en referencia al presidente d'Asturies, el voceru parlamentariu socialista y al secretariu xeneral de la FSA), pero los que defendemos la llingua vamos siguir equí, porque nun mos importa lo que pase con esti estatutu, sabemos que ye un momentu contestual de la política", añadió.

Palacio foi'l más duru de los tres a la hora de criticar la reforma estatutuaria acordada por 'populares' y socialistes. Acusó a la Federación Socialista Asturiana (FSA) de "apoyar en Madrid lo qu'equí nieguen", en referencia a la oficialidá de les llingües, los derechos o l'estatutu catalán. Del PP, recordó que "apoyó en toles comunidaes la carta de derechos ciudadanos, menos n'Asturies".