UVIÉU, 18 Ene. (EUROPA PRESS) -
El secretariu xeneral de la Federación Socialista Asturiana (FSA-PSOE), Adrián Barbón, llamó esti xueves al "diálogu ente toos" pa tratar na llexislatura próxima la oficialidá del asturianu nel Principáu. Pal líder socialista "nun sería seriu" inciar el procesu anguaño.
Preguntáu polos periodistes sobre esta cuestión mentes la so visita al pabellón d'Asturies en Fitur, Barbón señaló que fueron los militantes del PSOE asturianu los qu'abrieron el debate alredor de la oficialidá, una cuestión que va tener que tratase dientro de la reforma del Estatutu d'Autonomía.
Al so xuiciu, esta reforma tendría que tratase na llexislatura próxima, porque "nun sería seriu" acometela agora, a poco más d'un añu pa qu'acabe la llexislatura. Esta reforma va tener que dir hacia una cooficialidá "amable, dialogada, nada imperativa" y que tenga en cuenta la situación llingüística de la rexón.
El PSOE, dixo, va llevar esta cuestión nel so programa electoral pa 2019. Sobre esti asuntu, y preguntáu poles posibles candidatures a la presidencia del Principáu ente les files socialistes, repitió la importancia d'asitiar el debate nos problemes de los asturianos, y non en quién va liderar la llista del PSOE. "Primero'l qué, depués el quién", repitió.
