UVIÉU, 11 Dic. (EUROPA PRESS) -
El secretariu xeneral de la Federación Socialista Asturiana (FSA-PSOE), Adrián Barbón, sorrayó esti domingu la so intención d'implicase "al máximu" pa llograr un alcuerdu con IX y Podemos que permita sacar alantre los Presupuestos Xenerales del Principáu d'Asturies pa 2018.
Nunes declaraciones unviaes pol partíu depués de la celebración d'un actu con militantes en L'Entregu, Barbón recordó que yá na campaña de les primaries de la FSA dixo que yera "fundamental" que la esquierda entendiérase n'Asturies. "Busco un diálogu de la esquierda que lóxicamente tien que reflexase nel presupuestu, pero que nun termine ehí", señaló.
Asina, preguntáu pola pitición d'IX de que la FSA s'impliquese na negociación presupuestaria, respondió "sí al requerimientu d'IX" pa abrir víes de diálogu.
El secretariu xeneral de la FSA sorrayó amás la necesidá de que'l presupuestu salga alantre cola esquierda, al apreciar cola derecha asturiana "diferencies polítiques clares". Asina, refirióse a la pitición del PP de realizar rebaxes fiscales. "Si'l problema d'Asturies ye de recursos, ¿cómo vamos a amenorgar ingresos?", preguntóse, pa depués sentenciar que "ye inalmitible".
A IX y Podemos recordó-yos que les cuentes autonómiques pa 2018 introducen elementos que dambes formaciones ufrieron nel marcu de la negociación presupuestaria. Son unos presupuestos "muncho más sociales", sorrayó, y hai un aprovechamientu meyor de los recursos. "Nun sé si ye abondo, pero ye importante que sigamos dialogando", dixo. Por eso, convidó a dambes formaciones a que sigan dialogando cola conseyera de Facienda, Dolores Carcedo, pa llograr tener unos presupuestos n'Asturies "que sían meyores que los que tenemos en valir".
Si la esquierda "renuncia a influir" na ellaboración de los presupuestos, "los votantes preguntarán-yos qué fixeron colos sos votos". "Ye difícil que se xustifique nun apoyalos teniendo mayor inversión social, más apueste nel territoriu y más inversiones nos conceyos", aportunó.
