Barroso ve posible zarrar próximamente les negociaciones d'integración de Croacia na UE

BRUXELES, 4 de Marzu (EUROPA PRESS)

El presidente de la Comisión Europea, Jose Manuel Durao Barroso, dixo esti vienres que ye posible que les negociaciones d'integración na UE de Croacia acaben nun futuru próximu, "pero alvirtió que va ser un procesu bien esixente y que'l país balcánicu tovía tien de cumplir una serie de reformes y asegurar una plena collaboración col Tribunal Penal Internacional pa l'antigua Yugoslavia (TPIY)".

"Vamos facer tolo posible pa dar tolos pasos necesarios pa la integración", prometió en rueda de prensa al empar de Barroso, el nuevu presidente croata, Ivo Josipovic, "qu'afirmó'l compromisu coles reformes non yá pola integración a la UE, sinón porque creemos nelles".

Josipovic tamién se comprometió a trabayar pola integración rexonal, especialmente no referente a Bosnia y Herzegovina, porque "ye importante tener una bona rellación colos vecinos pa la mesma estabilidá de Croacia".

Barroso apoyó esa idea y afirmó que la estabilidá en Bosnia y Herzegovina ye un interés común que la UE comparte colos países de los Balcanes occidentales.

El presidente croata aconceyó tamién col presidente permanente del Conseyu, Herman Van Rompuy, que manifestó l'apoyu de la UE a la incorporación de Croacia a la Unión como una señal positiva al restu de la rexón.

Van Rompuy constató "les importantes meyores nunes negociaciones qu'entren na so fase final y que podríen acabar esti añu", pero reclamó "más esfuerzos pa progresar en reformes tovía pendientes", amás de considerar "esencial que'l país ofreza una cooperación total col TPIY".

SERBIA

Los dos líderes europeos tamién recibieron esti vienres en Bruxeles al primer ministru serbiu, Mirko Cvetkovic, y tresmitiéron-y un mensaxe asemeyáu que nel casu croata, al celebrar los progresos llograos y encamentar que siga avanzando nes reformes.

La plena collaboración col TPIY per parte de les autoridaes serbies y la necesidá de que contribuyan a la estabilidá de la rexón balcánica son dos elementos clave nel procesu d'integración, tamién nel casu de Serbia.

Belgrado presentó'l pasáu mes d'avientu la so candidatura pa incorporase a la Unión Europea, y Barroso declaró esti vienres que'l so Executivu ta preparáu pa presentar un primer informe oxetivu y detalláu sobro la solicitú en cuantes lo pida'l Conseyu.

Pela so parte, Cvetkovic sorrayó qu'el so Gobiernu "ye proeuropéu y que la integración a la UE figura bien altu na so axenda".

Amás, Barroso afirmó que la diferencia d'opinión sobro Kosovo, que declaró la so independencia de Serbia de manera unillateral, "nun tien de ser un trabancu para siguir avanzando nel procesu d'integración".