AVILÉS, 16 d'Avientu (EUROPA PRESS)
L'acuerdu ente Volotea, FADE, les Cámares de Comerciu d'Uviéu, Xixón y Avilés y los conceyos d'estes mesmes ciudaes p'abrir la base de la compañía nel Aeropuertu d'Asturies va suponer una ayuda de 700.000 euros per parte de les entidaes. Asina lo aseguró esti martes, mientres la firma del conveniu, el presidente de FADE, Pedro Luis Fernández.
Fernández desveló que los trés conceyos entregaron mediu millón d'euros, mientres que FADE encargóse d'otros 100.000 euros y les trés cámares de los otros 100.000 euros restantes. Aseguró que "güei los asturianos somos un pocu más ricos. Fáltenmos coses, pa tener más conexones colos aeropuertos principales pero tenemos más posibilidaes de ser atractivos pa otres llinies".
Na firma del conveniu participaron Lázaro Ros, director xeneral, de Volotea; Agustín Iglesias Caunedo, alcalde d'Uviéu; Pilar Varela, alcaldesa d'Avilés; Fernando Couto, teniente d'alcalde de Xixón; Fernando Fernández-Kelly, presidente de la Cámara de Comerciu d'Uviéu; Félix Baragaño, presidente de la Cámara de Comerciu de Xixón; y Francisco Menéndez, presidente de la Cámara de Comerciu d'Avilés. Acompañó-yos el director del Aeropuertu d'Asturies, Carlos San Martín.
Lázaro señaló que la nueva base va permitir la creación de 40 puestos de trabayu directos, 25 de los cualos van pertenecer a tripulación. Amás, va suponer la permanencia d'un avión na base, la primera n'España cola que cuenta la compañía. Nesti momentu tien cuatro nel estranxeru y el próximu añu va abrir una quinta n'Estrasburgu.
"El nuesu oxetivu primeru ye consolidar el tráficu domésticu y pal 2015/2016 incluyir dalguna llínea internacional", aseguró en referencia al Aeropuertu d'Asturies, y plantegó la posibilidá d'un vuelu a Munich, como yá s'anunciara. Tamién faló de que Canaries podría incluyise de magar d'entós como destín.
Pel momentu Volotea vuela dende Asturies a Málaga, Ibiza, Mallorca y Valencia y el próximu añu va facelo a Alicante, Menorca y Sevilla. Lázaro negó que vaya a facelo a Madrid: "somos una compañía qu'une ciudaes medies", nin qu'haya acuerdu con nenguna otra aerollinia nesi sen.
