Belén Fernández pide a Fomentu qu'en dos meses concrete un calendariu d'actuaciones pal segundu túnel de Payares

UVIÉU, 23 de Mayu (EUROPA PRESS)

La conseyera de Fomentu, Belén Fernández, demandó esti xueves al Ministeriu de Fomentu que nun plazu de dos meses concrete un calendariu d'actuaciones pal segundu túnel de la variante de Payares, dempués del anunciu de l'abertura, mientres esta llexislatura, d'ún de los dos tubos con anchu ibérico y tráficu misto.

Asina lo señaló en declaraciones a los medios, en rematando un alcuentru qu'ella y l'alcaldesa d'Avilés, Pilar Varela, caltuvieron en Madrid col secretariu Xeneral d'Infraestructures, Manuel Niño.

A preguntes de los periodistes, la conseyera de Fomentu repitió que "el segundu túnel precisa calendariu y plazos". Coles mesmes, pidió al Ministeriu de Fomentu "igualdá d'inversión p'Asturies, puesto qu'hasta'l momentu ye la última de les comunidaes del Noroeste español en nivel de licitaciones del Ministeriu de Fomentu, mientres l'añu y mediu que va de llexislatura".

"Pa nós, la valoración tocantes a la solución técnica ye positiva porque la realidá ye qu'aspirábamos a tener garantizáu'l tráficu misto y paez qu'esta solución que da'l Ministeriu va garantizámosla, pero nun podemos resalvar una circunstancia y ye que tamos falando de media solución", esplicó la conseyera de Fomentu.

"Por eso yo espero que nesi compromisu qu'asumió'l secretariu d'Estáu na xunta que caltuvimos cuando visitó Asturies, que nesi plazu de dos meses mos ponga claramente un calendariu con compromisos temporales claros de tolo pendientes" añadió. "Entendemos que la respuesta al segundu túnel ye inaplazable y queremos tamién un planteamientu, dispuestos a negociar y falar de cuál pue ser el marcu temporal, pero tamién un planteamientu claru de la llegada del AVE a la ciudá de Xixón" insistió Belén Fernández.

Pa la conseyera, "tamos falando puramente d'una solución pa ún de los túneles y yo invoco una premisa que nun podemos perder de vista y ye que'l Gobiernu d'Asturies sufre una situación d'agraviu presupuestariu en relación coles licitaciones del Ministeriu de Fomentu a lo llargo d'esta llexislatura. Ehí tán les cifres de les que falamos, y ye que representamos el 0,003% de les licitaciones del ministeriu nel últimu añu y mediu nel marcu del noroeste ibéricu" sorrayó la Conseyera.