MADRID / SANTIAGO DE COMPOSTELA, 20 Jul. (EUROPA PRESS) -
Un grupu de militantes y responsables políticos del BNG presentaron esti vienres un escritu na sede de la Real Academia Española (RAE), en Madrid, nel qu'esixe a la institución una "disculpa" por "deturpar" los topónimos de Galicia.
Y ye que, según esplicó la diputada nacionalista nel Parllamentu autonómicu Olalla Rodil, la llei de normalización llingüística de Galicia foi aprobada hai 35 años por unanimidá na Cámara autonómica.
Precisamente, esta norma señala nel so artículu 10 que "la única forma oficial" de la toponimia del país ye la gallega, amás de que "estes denominaciones son les llegales a tolos efectos".
A pesar d'esti marcu, el Bloque denunció que la institución que rixe'l castellanu caltién una "actitú de dexadez y de falta de respetu tanto al testu llegal como al idioma de la Comunidá". Según Rodil, "l'Academia española lleva frayando esa llei dende hai enforma tiempu".
La muestra "más de recién", prosigue, producióse nes redes sociales de la institución, cuando en xunu encamentó, al traviés del so twitter oficial, l'usu del topónimu acastellanáu 'Sangenjo' "fuera d'usos oficiales".
Amás, el BNG realizó esta denuncia "énte la pasividá absoluta polos que tendríen de ser --a la so manera de ver-- los primeros valedores de la llingua", en referencia a la Xunta y a la Real Academia Galega (RAG). "Por eso esta iniciativa, pa dexar claro que nun vamos permitir nin una sola falta de respetu más", sentenció.
