BRUXELES, 27 de Mayu (EUROPA PRESS)
La Comisión Europea pidió esti miércoles a España qu'acueya a un total de 5.837 refuxaos mientres los próximos dos años col fin d'amenorgar la presión sobre Italia y Grecia, los países más afectaos pola crisis migratoria nel Mediterráneu, y d'ofrecer víes llegales y segures de llegada a la UE a parte de los demandantes d'asilu que s'alcuentren nel norte d'África y Oriente Próximu.
En total, Bruxeles propón repartir 60.000 demandantes d'asilu ente los países de la UE mientres 2015 y 2016 per mediu dos programes. El primeru ye un plan de rellocalización d'emerxencia col oxetivu d'ayudar a Italia y Grecia, que va aplicase a los sirios y eritreos que precisen protección internacional y que llegaren a estos dos países dempués del 15 d'abril o lo faigan dempués d'activase'l mecanismu.
En total, 40.000 d'ellos reasitiaránse de forma obligatoria dende Italia y Grecia al restu d'Estaos miembros, siempre que los Gobiernos apoyen esta propuesta por mayoría cualificada. Esta cifra correspuende al 40% de los demandantes d'asilu qu'entraron nos dos países nel 2014. Los Estaos miembros van recibir 6.000 euros por persona rellocalizada nel so territoriu. Bruxeles podría llanzar un plan asemeyáu pa Malta. La cuota de repartu calculóse teniendo en cuenta'l PIB, la población, la tasa de paru y los esfuerzos pasaos. El país receptor va ser el que decida si concede o non l'asilu.
El segundu programa, qu'a diferencia del anterior tien calter voluntario, pretende reasentar n'Europa a 20.000 refuxaos que tán nel norte d'África, el Cuernu d'África y Oriente Próximu col fin d'evitar que s'embarquen y puean morrer na mar. Los Estaos miembros que participen nel plan van tener derechu a ayuda financiero, pa la que Bruxeles va destinar un total de 50 millones d'euros mientres los años 2015 y 2016. El repartu calculóse colos mesmos criterios que'l primer programa.
De la cuota de 5.800 refuxaos axudicada por Bruxeles a España, un total de 4.288 correspuenden al repartu obligatoria: 2.573 procedentes d'Italia y 1.715 de Grecia. Como nengún de los dos países beneficiarios del programa de rellocalización participen, el porcentaxe correspondiente a España aumentó lixeramente dende'l 9,1% del total anunciáu a primeros de mes al 10,72%. Los 1.549 demandantes d'asilu restantes que tien d'acoyer España son del plan de reasentamientu dende'l norte d'África.
D'aprobase esti repartu, obligaría a España a elevar considerablemente l'esfuerzu realizáu nos últimos años en materia d'asilu. España alcuéntrase ente los países de la UE onde se rexistren menos pidimientos d'asilu y l'añu pasáu concedió protección internacional namás a 1.600 persones (el 1,15% de les decisiones positives en tola UE) y aceptó acoyer a 125 refuxaos en programes de reasentamientu.
El Gobiernu de Mariano Rajoy yá espresó, al traviés del ministru d'Esteriores, José Manuel García Margallo, el so refugu a la cuota que quier asigna-y Bruxeles porque considera que nun tien abondo en cuenta l'altu nivel de paru n'España, qu'enzanca la capacidá d'integrar a los refuxaos. La tasa de paru ye unu de los cuatro criterios qu'utilizó la Comisión pa calcular les cifres, pero namás pesa un 10%.
Tamién Francia opónse a les cuotes obligatories, un sistema que sí apoya Alemaña, que ye xunto con Suecia, ye l'Estáu miembru que concede un mayor númberu de solicitúes d'asilu. La propuesta de Bruxeles topeta amás col refugu frontal de Reinu Uníu, anque Londres benefíciase, xunto con Irlanda y Dinamarca, d'una exención que-y permite nun participar nel repartu.
Los países que van tener qu'asumir un mayor númberu de refuxaos según la propuesta de Bruxeles son Alemaña (el 21,91% de los rellocalizados dende Grecia ya Italia), Francia (16,88%), España (10,72%), Polonia (6,65%) y Holanda (5,12%).
