UVIÉU, 29 de Xunetu (EUROPA PRESS)
L'alcalde d'Uviéu, Wenceslao López, reunióse esti miércoles col Deán de la Catedral, Benito Gallego, pa tratar el conveniu que'l Conceyu tenía firmáu col Cabildu y del que s'aplazó la so prorroga na última comisión de Cultura por cuenta de discrepancies col Gobiernu municipal pol cobru d'entrada a la Catedral a estudiantes y pensionistes d'Uviéu.
Tres la xunta, Gallego comunicó a los medios que nun se renovará'l conveniu, de 20.700 euros, porque "el Cabildu nun quiso" pa evitar cualquier problema". Sicasí, afirmó qu'existió "bona sintonía con tolos temes que nos ocupen" y qu'esclararon "dalguna cosa que nun s'interpretó correctamente", según una nota del Conceyu uvieín.
Sobre'l tema de disputa ente la entidá relixosa y los representantes de la sociedá civil, la titularidá de la propiedá del Xardín de los Reis, el Deán manifestó que "tal como ta ye lo meyor" y aseguró que'l discutiniu "nun tien mayor trescendencia pero de primeres va quedar como ta".
No referío al conveniu valoró que la renuncia "déxanos más llibres pal tema de posibles conciertos nel claustru o na Catedral con motivu del recital d'Alfonso II". "Preferimos ser llibres, atayar el discutiniu y dexar al Cabildu más llibre pa poder actuar como quiera", añadió.
Pela so parte, l'Alcalde empezó la so intervención a la prensa asegurando que, n'ocasiones, "el falar al traviés d'entemediarios nunca ye bueno porque ye muncho más fácil facelo como lo ficimos agora. La Ilesia y el Conceyu tenemos los nuesos ámbitos d'actuación y tenemos que collaborar en tolo que puea repercutir en beneficiu de los uvieínos".
Al respective de la renuncia del conveniu, el primer edil afirmó que "nun tien mayor importancia". "Teníen dificultaes pa caltener, por casu, los conciertos nel claustru", esplicó.
En cuanto al proyectu del Muséu nel recintu del 'Martiellu de Santa Ana', López dexó claro que "ye un asuntu nel que la Ilesia nun tien qu'intervenir, nun hai llugar a falar d'eso". A Uviéu, según l'Alcalde, "nun-y vien mal un Muséu de la ciudá pero va haber qu'esperar a tiempos meyores y tratar de llevar alantre esi proyectu".
