VARSOVIA, 20 de Xunetu (Reuters/EP)
La Cámara Baxa del Parlamentu polacu aprobó esti xueves la contestada reforma xudicial que la oposición denuncia que va minar la independencia xudicial y la democracia nel país.
La llei, presentada pol gobernante Partíu Llei y Xusticia (PIS), ten qu'aprobase agora na Cámara Alta, onde la formación tamién cuenta con mayoría.
L'aprobación produzse magar les alvertencies de Bruxeles. Esti miércoles, el vicepresidente primeru de la Comisión Europea, Frans Timmermans, avisó al país de que taba "mui cerca" d'entamar el procesu p'activar l'artículu 7 del Tratáu de la UE, lo que na práctica podría llevar a suspender el derechu a votu de Varsovia nes decisiones a 28.
"Les midíes recientes amplifiquen l'amenaza al Estáu de derechu", dixo Timmermans tres una xunta del Executivu comunitariu, adelantando que l'asuntu volverá vese la próxima selmana.
La reforma que propón el Gobiernu polacu va destituyir a los actuales miembros del Conseyu Nacional del Poder Xudicial (KRS), unu de los principales órganos xudiciales de Polonia, onde los miembros nómalos el presidente del mesmu, y va facultar al Parlamentu pa escoyer 15 de los sos 25 miembros.
