Reivindica la so decisión de convocar la consulta y asegura que toca tar "xuníos" y "avanzar"
LONDRES, 19 Sep. (EUROPA PRESS) -
El primer ministru británicu, David Cameron, aseguró esti vienres, en conociendo'l refugu d'Escocia a la independencia, que'l resultáu del referéndum ye "claru" y que l'alderique de la secesión ta "resueltu pa una xeneración".
"L'alderique ta resueltu pa una xeneración... O como dixo Alex Salmond: Quiciabes pa una vida. Por tanto, nun puede haber disputes nin repeticiones, escuchemos la voluntá decidida del pueblu escocés", aseguró'l primer ministru británicu, na so primer comparecencia énte la prensa en Downing Street, en conociendo'l refugu a la secesión espresáu polos escoceses na consulta d'esti xueves.
Cameron aseguró que'l referéndum tuvo un resultáu "claru" y afondó en qu'agora toca que'l país tea "xuníu" y "avanzar". "El pueblu d'Escocia faló y el resultáu ta claru. Caltuvieron el nuesu país de cuatro naciones xuníu y yo, como millones de persones, toi encantáu", dixo.
El 'premier' británicu reivindicó la so decisión de convocar esta consulta d'independencia acordies col Executivu escocés. "Yera correuto que respetáramos la mayoría del SNP nel Gobiernu y diéramos al pueblu escocés el drechu a tener la pallabra", aseguró.
Nesta mesma llinia, Cameron dixo que, anque "siente pasión pol Reinu Xuníu", defínese como "un demócrata que tenía qu'aceutar el drechu ganáu por SNP pa tener la so voz". Una vegada la ciudadanía se pronunció y pa superar les divisiones xeneraes en casi dos años de campaña, Cameron apeló a la unidá pa garantizar la materialización de les ambiciones en materia de tresferencia de competencies a Edimburgo, pero amestó la necesidá d'ampliar esti oxetivu a los demás integrantes de Reinu Xuníu.
RESPUESTA A SALMOND
En respuesta al envite qu'esta mesma mañana llanzó-y el ministru principal d'Escocia, Alex Salmond, recordó a "los escépticos sobre les promeses constitucionales" espresaes na campaña que yá s'amosó la disposición a faceles realidá esta llexislatura y que "los tres partíos británicos van facer qu'avancen na próxima". "Escuchámosvos", aseguró a los votantes.
Como prueba, dio anuncia de que yá nomó al encargáu de supervisar el procesu de tresferencia de poderes, el responsable de los Xuegos de la Commonwealth del pasáu branu, lord Robert Smith, quien tendrá qu'ellaborar un llibru blancu pa payares y tendrá que presentar en xineru'l borrador de la llei que va otorgar a Escocia un autogobiernu "ensin precedentes".
La ufierta plantegada nos últimos díes de campaña pa ganar a los indecisos, sicasí, xeneró un importante malestar en Westminster, especialmente ente les mesmes files conservadores, polo qu'el 'premier' apostó por abordar la cuestión en paralelo a un procesu de descentralización pa tol Reinu Xuníu.
SITUACIÓN N'INGLATERRA
N'especial, Cameron refirióse a la situación d'Inglaterra, l'únicu de los cuatro integrantes que nun tien Parlamentu propiu, magar que los sos diputaos son mayoría na Cámara de los Comunes. Les sos particularidaes riquen "una solución xusta tamién", especialmente ante'l fechu de que parllamentarios escoceses puedan votar en cuestiones qu'afeuten n'esclusiva a Inglaterra pero non al contrario, la denominada 'cuestión inglesa' o 'West Lothian question'.
Esta nueva dómina abierta pol referéndum escocés xeneró una corriente descentralizadora nel primer ministru, quien avanzó que prevé trespasar más competencies a les ciudaes y que va dar a conocer los planes nos próximos díes. "Tenemos una gran oportunidá pa camudar a meyor cómo se gobierna a los británicos y los políticos tenemos de xuninos y ser constructivos pa toos y caún de los ciudadanos de Reinu Xuníu", sostuvo.
Nesti sen, consideró que "un nuevu alcuerdu más xustu pa Escocia tien qu'aplicase a los demás", de cuenta que'l trespasu de parte de la política tributaria, de gastu y de Bienestar a Edimburgu debe ser acompañáu de "más poder pa Inglaterra, Gales ya Irlanda del Norte", tres árees que merecen "mayor decisión y ver los sos drechos protexíos y ameyoraos".
