Habrá entrada llibre a les actuaciones de Rosendo y Miguel Costas, de 'Siniestro Total', xunto cola banda asturiana 'Dixebra'.
UVIÉU, 17 Sep. (EUROPA PRESS) -
El conciertu de 'Extremoduro' previstu pa esti vienres, 19 de setiembre, nel recintu de La Ería foi atayáu por problemes téunicos, según informen dende'l Conceyu d'Uviéu.
L'actuación, programada dientro de les fiestes de San Mateo 2014, incluyía nel contratu ente la Sociedá Uvieína de Festexos (SOF) y RocknRock "una serie de cambeos nel escenariu y demás instalaciones del recintu". Sicasí, "a pesar de la voluntá de la SOF y de la banda de personase énte'l so públicu, y en realizando delles visites téuniques pa buscar alternatives, por dellos factores, foi imposible atopar una alternativa vidable", espliquen dende'l Consistoriu.
"Tanto la banda, como la SOF y como RocknRock, intentaron hasta l'últimu momentu atopar soluciones pa los problemes téunicos. L'importe de les localidaes vendíes, según comunica RocknRock, va ser devueltu a partir del xueves 18 de setiembre nos mesmos puntos de venta onde fueron compraes", indiquen.
Tres la cancelación del conciertu de 'Extremoduro', la SOF programa pa esti vienres les actuaciones de Rosendo y Miguel Costas, de 'Siniestro Total', xunto cola banda asturiana 'Dixebra'. El conciertu va ser d'entrada llibre y gratuita hasta completar aforu.
