El CAO considera que les declaraciones d'Aréstegui sobre la so propuesta d'oficialidá son a títulu individual

UVIÉU, 08 de Xunetu (EUROPA PRESS)

El Conceyu Abiertu pola Oficialidá (CAO) entiende que les declaraciones del parlamentariu popular autonómicu Joaquín Aréstegui, descartando l'asunción per parte del so partíu de la propuesta d'oficialidá de la llingua asturiana, "son inviduales y nun recueyen el sentir del so partíu".

Asina lo manifestó'l voceru d'esti colectivu, Fernando Ornosa, en declaraciones a Europa Press. El representante del CAO respondía asina a les afirmaciones d'Aréstegui esta mañana, quien, tamién en declaraciones a Europa Press, dexaba claro que'l so partíu nun ta a favor de la oficialidá y que nun va asumir "de nenguna manera" la propuesta qu'esta mañana presentó-y el Conceyu. La mesma consiste nuna redaición del artículu cuartu del Estatutu d'Autonomía d'Asturies, nesti momentu en procesu de reforma, que recueye la oficialidá del castellanu, l'asturianu y la fala occidental.

Pa Ornosa la d'Aréstegui ye "una declaración individual que se desmarca d'otros cargos del PP". Ente ellos, citó al alcade d'Uviéu, Gabino de Lorenzo, a la cabezalera del PP de Xixón, Pilar Fernández Pardo, o al secretariu xeneral de la formación, Reinerio Álvarez. "Toos ellos ya ficieron declaraciones públiques a favor de la oficialidá", matizó Ornosa. Amás, recordó qu'ente les persones que tuvieron ayeri na presentación pública de la propuesta del CAO ante la Xunta Xeneral taben miembros del PP, ente ellos Humberto Gonzali.

Pa Ornosa, "ye una imprudencia desmarcase d'esta manera, ensin consultalo col restu del partíu", y afirmó qu'esta actitú "sólo conduz al asturianu a la desapaición".

Dexó claro amás que "querer dar pasos hacia los derechos d'usu nun ye denguna garantía si nun hai oficialidá, porque la llingua nun tien validez xurídica, nin nel ámbitu priváu nin nes rellaciones coles Alministraciones".

MOTIVOS DEL REFUGU.

El voceru del CAO acabó entrugándo-y a Aréstegui "qué motivos tien el PP pa nun asumir el testu del Conceyu". "Qu'espliquen públicamente por qué nun ye asumible", pidió Ornosa, amás d'espresar la so esperanza en qu'otros miembros del partíu se pronuncien sobre esti tema.