Aviso: Esta noticia tiene más de un año. Última actualización: 09/02/2010 19:00
La Direición Xeneral de Carreteres cortó güei ún de los carriles de l'autovía minera, l'AS-I, al altor del puntu kilométricu 21.400 pola desestabilización d'una lladera na boca norte del túnel de Picaplana, na calzada que van dende Mieres a Xixón, según informó'l Gobierno autonómicu nuna nota prensa.
La desestabilización supón la formación de resquiebres na parte superior d'una boca del túnel y provocó l'argayu de piedres d'un tamañu aproximáu de 0,5 tonales que quedaron suxetes pola malla de triple torsión.
Sicasí, pola evolución del argayu, que podría provocar la cayida de priedres sobre la carretera, y a la necesidá d'estabilización de la lladera, decidióse cortar un carril pa garantizar la seguri*da vial y proceder a iguar el problema.
Les obres consistirán nel saniamientu de la lladera. Pa ello, eliminaráse tol material argayáu; estabilizaráse la lladera con escolleres; respondráse'l malláu y realizaránse llabores de meyora del drenaxe mediante cunetes y drenes.
Nel tiempu que duren les obres, el tráficu circulará en doble sentíu al traviés d'ún de los tubos del túnel de Picaplana. Yá s'afayó un esvíu provisional que tará debidamente señalizáu nes inmediaciones de la zona afectada.