Foto: Reuters
UVIÉU, 2 de Febreru (EUROPA PRESS)
La Conseyería de Fomentu, Ordenación del Territoriu y Mediu Ambiente informó de qu'a primer hora d'esta mañana de xueves ye aconseyable l'usu de cadenes en diez carreteres y puertos d'Asturies por nieve y xelu.
Les víes que precisen cadenes a estes hores son les siguientes: L'Altu de Bedules, en Ponga; la carretera que va de Sotres a la llenda con Cantabria y los puertos de Tarna, San Isidro, Ventana, Somiedu, San Llorienzo, L.leitariegos, Zarréu y el Couniu.
Per otra parte, procedióse a cortar l'accesu a la carretera de Llagos de Cuadonga. Nesti casu, trátase d'una vía poco transitada pa desplazamientos habituales y que se zarra temporalmente pa evitar problemes na circulación.
L'equipu de vialidá ivernal de la Dirección Xeneral de Carreteres trabaya pa facilitar la circulación en toles carreteres de la rede d'Asturies.