MADRID, 19 de Xunu (EUROPA PRESS)
L'exvicepresidente del Gobiernu Francisco Álvarez-Cascos afirmó esti llunes nel xuiciu pola primer época de la trama Gürtel (1999-2005) que se celebra na Audiencia Nacional que mientres foi ministru de Fomentu (2000-2004) esti departamentu nun tuvo "nengún tratu de favor" con nengún empresariu p'axudicar concursos d'obres públiques.
Álvarez-Cascos compareció na xornada octaxésima segunda del xuiciu como testigu, a propuesta de la defensa del extesoreru del PP Luis Bárcenas, pa qu'esplique el supuestu pagu de comisiones por axudicaciones concedíes pol Ministeriu que dirixía a la rede corrupta liderada por Francisco Correa.
L'exministru --que s'apoyó mientres la hora que duró la so declaración n'informes de la Unidá de Delincuencia Económica y Fiscal (UDEF) de la Policía Nacional, procedimientos xudiciales paralelos calteníos con dalgún de los acusaos nesta causa o artículos de periódicu-- insistió en que mientres la so etapa como vicepresidente del Executivu (ente 1996 y 2000) y como ministru de Fomentu nun recibió "nenguna llamada" dende'l PP p'axudicar concursos a nenguna empresa.
"Nos cuatro años que fui vicepresidente del gobiernu nun tenía responsabilidá en materia de concursu. Nunca recibí nenguna llamada nin nenguna indicación rellacionada con axudicaciones", afirmó'l tamién expresidente del Principáu d'Asturies.
"INVEROSÍMILES" LES AFIRMACIONES DE CORREA
Al exministru preguntáron-y pola declaración de Correa na qu'aseguró que dellos constructores recurría a les sos intermediaciones pa ser beneficiarios de los concursos públicos --afirmaciones que llevaron a la reabertura de la investigación sobre la existencia d'una 'caxa B' nel PP--.
Sobre esto, Álvarez-Cascos dixo que nun conoz a Plácido Vázquez, persona que supuestamente fizo d'entemediariu ente'l Ministeriu y les empreses, y que ye "imposible o inverosímil esta versión" porque "na mio época yeren imposibles los tratos de favor nos concursos d'obres y servicios". Amás, indicó que desconoz si Correa fizo dalgún tipu de donación al partíu.
Coles mesmes, añadió que tien "la seguridá" de que los "altos cargos" del Ministeriu de Fomentu nun recibieron tampoco nenguna llamada pa dar dalgún tipu de suxerencia". "Esi tipu de comportamientos nun tenia cabida", recalcó. Álvarez-Cascos esplicó que cuando entró a dirixir Fomentu nel añu 2000 cambió tola normativa referente a la contratación y axudicación de servicios públicos pa evitar "delles conductes" de ministros anteriores y fizo referencia al exministru socialista José Borrell.
Según l'exdirixente 'popular' l'oxetivu col cambiu de los pliegos de condiciones yera "garantizar la concurrencia, la tresparencia y l'oxetividá de los concursos" pa que fuera "materialmente imposible" la existencia de dalgún criteriu de discrecionalidá, arbitrariedá y manipulación". Ye más, insistió en que d'esa manera'l ministru de Fomentu nun intervino nos procesos d'axudicación porque toles decisiones yeren acataes polos miembros de la mesa de contratación.
NUN CABEN "LES IMPOSICIONES" NEL PP
No que cinca a Bárcenas, col qu'apuntó que tuvo relación namás como compañeros de partíu, caltuvo que nun ofreció nengún tipu d'instrucción, dao que les sos responsabilidaes como xerente del PP, asina como los estatutos de la formación, dependíen directamente del extesoreru Álvaro Lapuerta: "Nun tengo nengún reproche a la conducta del señor Bárcenas como xerente", señaló.
Nesta llinia, tamién negó que Bárcenas pudiera influyir na contratación d'empreses pa entamar les campañes electorales de la formación política, dao qu'esta selección correspondía a les "distintes árees o grupos de trabayu" de la Secretaría d'Acción Electoral: "Refugo la posibilidá d'imposición, los grupos de trabayu facíen les distintes propuestes pero creo que nun cabíen les imposiciones", dixo.
La fiscal Concepción Sabadell investigó sobre los informes de la UDEF qu'obren nel sumariu d'esta causa qu'esponen que'l beneficiu llográu poles sociedaes de la trama Spinaker 2000 y Rialgreen pola organización de la campaña electoral de los años 2003 y 2004 --que facturaron más de trés millones d'euros al PP por esti cometíu-- estremaríase ente delles persones ente les qu'apaecen les sigles 'P.A.C.'.
Al respective, Álvarez-Cascos apuntó que nesi momentu nun tenía nengún cargu nel partíu y que, poro, nun participó en nenguna campaña. Amás, sorrayó que nin siquier conoz les empreses citaes y que dende'l primer momentu desmintió estes acusaciones.
